नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले आफ्नो पालामा सुरु भएको सुशासनका कामहरु वर्तमान सरकारले भत्काइरहेको आरोप लगाएका छन्।
शुक्रबार बिहान डडेलधुरामा पत्रकारहरुसँग कुराकानी गर्दै प्रचण्डले अहिलेको सरकार राम्रो काम गर्नेलाई दण्डित गर्ने र नराम्रो गर्नेलाई पुरस्कृत गर्नतिर लागेको बताएका हुन्।
‘अहिले हाम्रो ध्यान सरकारतिर छैन। ढलाउने वा बनाउने तिर ध्यान छैन। यद्यपि हामीलाई चिन्ता छ, सरकार गलत बाटोमा हिँडेको छ। हामीले सुरु गरेका कामहरुलाई भत्काउँर्दैछ। राम्रोलाई दण्डित गर्ने र नराम्रो गर्नेलाई पुरस्कृत गर्दैछ। यसमा हामी निरन्तर खबरदारी गरिरहेका छौं। यसप्रति हामी चिन्तित छौं।’
अध्यक्ष प्रचण्डले प्रधानमन्त्री केपी शर्मा ओली र उनको क्याबिनेट आलोचकहरुलाई जसरी पनि फसाउन लागेको आरोप पनि लगाए।
‘आफ्नो अलिकति आलोचक छ भने जसरी पनि फसाउनेतिर प्रधानमन्त्री कार्यालय र क्याबिनेट लागेकोमा हाम्रो खबरदारी छ,’ उनले भने।
आजबाट सुरु हुने मध्यपहाडी लोकमार्ग केन्द्रित अभियानका लापिग डडेलधुरा आइपुगेका बेला आफूलाई कांग्रेस सभापति शेरबहादुर देउवाले आफ्नो जिल्लामा स्वागत भनेको जानकारी पनि उनले दिए।
‘यहाँ आउँदा धेरै नेताहरुसँग कुराकानी भयो, कांग्रेस सभापति देउवाजीले पनि मेरो जिल्लामा स्वागत भन्नुभयो’, उनले भने।
