नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' ले पूर्वपञ्चहरूले जेठ १५ गतेदेखि आन्दोलन गर्न खोजेकोले निस्तेज पार्नुपर्ने बताएका छन्।
उनले पूर्वपञ्चहरूका गतिविधिलाई निस्तेज गर्न वाइसिएललगायत युवाहरूलाई अपिलसमेत गरेका छन्।
नवराज सुवेदी नेतृत्वको 'संयुक्त जनआन्दोलन समिति' ले जेठ १५ गतेदेखि अनिश्चितकालीन 'जनआन्दोलन' को घोषणा गरेका छन् भने यो आन्दोलनमा राप्रपा, राप्रपा नेपाललगायत विभिन्न पार्टी र ४० भन्दा बढी समूहहरूले समर्थन जनाएका छन्।
यो पनि: पहिला नमानेका राजावादीहरू नवराज सुवेदीकै नेतृत्वमा एकत्रित हुन कसरी भए सहमत?
राजसंस्था पुनर्स्थापनालगायत एजेन्डामा राजावादीहरूले आन्दोलन गर्न लागेपछि त्यसप्रति लक्ष्य गर्दै माओवादी अध्यक्ष प्रचण्डले उनीहरूका गतिविधि निस्तेज पार्न अपिल गरेका हुन्।
‘अहिले सबै पूर्वपञ्च मिलेर जेठ १५ गतेदेखि आन्दोलन घोषणा गरेका छन्। कर्णालीवासी जनसमुदाय र वाइसिएललगायत युवाहरूलाई विशेष रूपले अपिल गर्न चाहन्छु- उनीहरूको गतिविधिलाई निस्तेज पार्नका लागि हर ठाउँमा, हर टोलमा, हर घरमा जानुपर्नेछ। प्रतिक्रान्तिकारी षड्यन्त्रको भण्डाफोर गर्नुपर्नेछ।’
यो पनि: १२ दिनसम्म नगरकोट बसे पूर्वराजा ज्ञानेन्द्र शाह, क-कसलाई भेटे?
कर्णाली प्रदेशको राजधानी वीरेन्द्रनगर सुर्खेतमा सोमबारबाट सुरू भएको पार्टीको भातृ संगठन वाइसीएल (योङ कम्युनिस्ट लिग) कर्णाली प्रदेश समितिको प्रथम सम्मेलनलाई सम्बोधन गर्दै अध्यक्ष प्रचण्डले माओवादी केन्द्र समाजवादी अभियानमा रहेको पनि बताए।
‘हामी सरकारको नेतृत्वमा रहँदा अन्तर्राष्ट्रिय क्षेत्रमा नेपाल र नेपाली जनताको इज्जत र प्रतिष्ठा बढाउन काम गर्यौं।चीनसँगको सहकार्यबाट कर्णाली लगायत देशको उत्तरी सीमामा रहेका नागरिकका लागि आर्थिक अवसरको ढोका खोल्ने पहल गरियो,’ उनले भने।
अध्यक्ष प्रचण्डले माओवादी केन्द्र संविधान संशोधनको पक्षमा रहेको उल्लेख गर्दै दलित, महिला, मधेसी, थारू, मुस्लिम र आदिवासी जनजातिलाई समेट्दै समावेशी प्रतिनिधित्व सुनिश्चित गर्न संविधान संशोधन आवश्यक रहेको बताए।
‘हामी प्रत्यक्ष निर्वाचित कार्यकारी प्रमुखसहितको शासकीय स्वरूप चाहन्छौं। अहिलेको निर्वाचन प्रणाली खर्चिलो, अपारदर्शी र जनविरोधी छ। यसले जनताको प्रतिनिधित्व होइन, पैसाको चलखेललाई संस्थागत गरिरहेको छ,’ उनले भने।
साथै अध्यक्ष प्रचण्डले पछिल्लो समयमा सरकारले गरेका जनविरोधी गतिविधिबाट जनतामा देखिएको असन्तुष्टिलाई राजावादी र प्रतिगामी शक्तिहरूले दुरुपयोग गर्न खोजेको आरोप लगाए।
भिडिओ:
