पाकिस्तानमा मिसाइल आक्रमणबारे भारतले औपचारिक रूपमा बोलेको छ।
भारतले यसलाई जम्मू-कश्मिरको पहलगाममा अप्रिल २२ तारिखका दिन भएको आतंकवादी हमलाको जबाफ भनेको छ जसमा एक नेपालीसहित २६ जनाको वीभत्स हत्या भएको थियो।
यसबारेमा बुधबार दिउँसो पत्रकार सम्मेलन गरी भारतको विदेश मन्त्रालयले पहलगाम घटनामा पाकिस्तानको भूमिका रहेकाले बुधबार आक्रमण गरिएको स्पष्टीकरण दिएको छ।
त्यसको जबाफमा अपरेशन सिन्दुर चलाएर आतंकवादी संगठनका अड्डालाई लक्ष्य गरी आक्रमण गरिएको मन्त्रालयले बताएको छ।
भारतीय सेनाकी कर्नेल सोफिया कुरैशीले बुधबार राति १:०५ देखि साढे १ बजेको बीचमा पाकिस्तानी भूभागमा मिसाइल आक्रमण गरिएको जानकारी दिइन्।
'७ मे २०२५ को राति १ बजेर ५ मिनेटदेखि साढे १ बजेबीच भारतीय सशस्त्र बलले गरेको 'अपरेशन सिन्दुर' ९ अड्डामा लक्ष्य गरिएको थियो । ती सबै अड्डाहरु नष्ट भएका छन्,' उनले भनेकी छन्।
उनले पाकिस्तानमा तीन दशकदेखि आतंकवादी संरचना निर्माण भइरहेको र त्यहाँ आतंकवादी संगठनका भर्ती केन्द्रहरू, तालिम केन्द्र, लन्चप्याड सञ्चालित रहेको बताएकी छन्।
भारतीय विदेश मन्त्रालयका सचिव विक्रम मिश्रीले कश्मिरको सामान्य अवस्थालाई खलल पार्ने उद्धेश्यले त्यसदिन आतंककारीहरूले पर्यटकहरूलाई लक्ष्य गरी आक्रमण गरेको बताएका छन्।
उनले कश्मिरमा भएको उक्त आक्रमणमा पाकिस्तानको भूमिका रहेको प्रमाण भारतसँग रहेको पनि दाबी गरेको अन्तर्राष्ट्रिय समाचार संस्था रोयटर्सले लेखेको छ।
'पहलगाम आक्रमणको जिम्मेवारी रेसिस्टेन्ट फ्रन्ट (आरटिएफ) भनिने समूहले लिएको छ। यो समूह लश्कर-ए-तैयबासँग जोडिएको छ त्यसकारण पाकिस्तानको सम्बन्ध स्पष्ट रूपमा स्थापित भएको छ,' उनले भनेका छन्।
पहलगाममा भएको आतंकवादी आक्रमणबारे विश्वव्यापी चिन्ताका बाबजुद पनि पाकिस्तानले आफ्नो भूमिबाट सञ्चालित आतंकवादी सञ्जालहरूलाई नष्ट गर्नका लागि कुनै कारबाही नचलाएकाले पनि उक्त आक्रमणमा उसको भूमिका प्रष्ट हुने मिश्रीले बताएका छन्।
उनले थपे कि विश्वसनीय गुप्तचर जानकारी र बढ्दो विश्वव्यापी चिन्ताको बाबजुद पनि पाकिस्तानले आफ्नो भूमिबाट सञ्चालित आतंकवादी सञ्जालहरूलाई नष्ट गर्न कुनै कारबाही गरेन।
'पाकिस्तानले आतंककारीहरूको लागि सुरक्षित आश्रयस्थलको रूपमा विश्वमा पहिचान बनाएको छ,' उनले भने।
सिमापारी हुने आतंकवादको जबाफमा भारतले बुधबार बिहान आक्रमण गरेको उनले प्रष्ट पारेका छन्।
आक्रमण आतंकवादीहरुको आश्रयस्थलहरूलाई लक्ष्य गरेर गरिएको पनि उनले बताएको रोयटर्सले लेखेको छ।
पत्रकार सम्मेलन छोटो रहेको प्रश्नोत्तर पनि नभएको रोयटर्सले जनाएको छ।
पाकिस्तानले भारतीय आक्रमणको जबाफ दिने भनिसकेको छ। उसले भारतीय पक्षले हानेको ५ वटा फाइटर जेट खसालेको दाबी पनि गरेको छ।
फ्रान्समा निर्मित तीनवटा राफेल विमान र दुइटा रुसमा बनेका लडाकु जहाज खसालेको पाकिस्तानले दाबी गरेको समाचार संस्था रोयटर्सले जनाएको छ।
विमान खसालेको पाकिस्तानी दाबीबारे भारतले अहिलेसम्म कुनै प्रतिक्रिया दिएको छैन। यदि यो पुष्टि भयो भने, यो भारतीय सेनाको लागि दशकौंपछिको सबैभन्दा ठूलो क्षति हुनेछ।
राफेल लडाकु विमान भारतीय सेनाको आधुनिकीकरण गर्ने योजना अन्तर्गत भारतले किनेको हो।भारतीय वायुसेनासँग ३६ वटा राफेल लडाकु विमान छ।
पत्रकार सम्मेलनमा भारतले यसबारेमा कुनै पनि प्रतिक्रिया जनाएन।
भातरले आतंकवादीहरूको आधार इलाका भनेर मिसाइल हानेपछि पाकिस्तानी सेनाले कश्मिरमा गरेको बमबारीमा परी १० भारतीयको मृत्यु भएको रोयटर्सले जनाएको छ।
भारतीय विदेशमन्त्री यस जयशंकर, गृहमन्त्री अमित शाह लगायतले सामाजिक सञ्जालमा लेख्दै आतंकवादविरूद्ध 'अपरेशन सिन्दुर' चलाइएको बताएका छन्।
जयशंकरले आतंकवादविरूद्ध शून्य शहनशीलताको नीति अवलम्बन गरिनुपर्ने बताएका छन्। गृहमन्त्री अमित शाहले भारतीय सेनाप्रति गर्व रहेको भनेका छन्।
आक्रमणपछि दुवै देशका विभिन्न क्षेत्रहरूका विद्यालय बन्द गरिएका छन्।
पाकिस्तानमा हवाइ आक्रमणपछि अन्तर्राष्ट्रिय उडानहरु प्रभावित भएका छन्। धेरै एशियाली एयरलाइन्सहरूले युरोप जाने र फर्कने उडानहरू रद्द गरेको रोयटर्सले जनाएको छ।
विशेषगरी ताइवान, दक्षिण कोरिया, थाइल्याण्ड, भियतनामका विभिन्न उडान र भारतीय एयलराइन्सहरू एयर इन्डिया, इन्डिगो, स्पाइसजेट लगायतका विमानहरूले उडान रद्द गरेका छन्।
सिंगापुर एयरलाइन्स, ब्रिटिश एयरवेज, फिनएयर, एयरोफ्लोट जस्ता एयरलाइन्सहरूले पनि रूट परिवर्तन गरेका छन्।
भारतले गरेको आक्रमणबारे संयुक्त राष्ट्रसंघ, अमेरिका र चीनले प्रतिक्रिया जनाइसकेका छन्।
संयुक्त राष्ट्रसंघले दुवै देशलाई संयमता अपनाउन आग्रह गरेको छ भने चीनले आक्रमणलाई खेदजनक भनेको छ। चीनले घटनालाई नजिकबाट नियालीरहेको र दुवैलाई संयमता अपनाउन आग्रह गरेको छ।
अमेरिकी राष्ट्रपति डोनाल्ड ट्रम्पले आक्रमण बन्द हुने आशा व्यक्त गरेका छन्। उनका विदेशमन्त्री मार्को रूबिओले भने घटनालाई नजिकबाट नियालीरहेको बताएका छन्।
