काठमाडौंबाट अपहरण गरिएको इन्डियन एयरलाइन्सको 'आइसी ८१४' जहाज प्रकरणसँग जोडिएका मसूद अजहरले बुधबार बिहानको भारतीय हमलामा आफ्नो परिवारका केही सदस्य र सहयोगीहरू मारिएको बताएका छन्।
आजभन्दा २५ वर्षअघि सन् १९९९ डिसेम्बर २४ (२०५६ पुस ९ गते) मा काठमाडौंबाट दिल्ली उडेको आइसी–८१४ जहाज आतंकवादीहरूले अपहरण गरेका थिए। जहाजमा चालक दलसहित १८८ जना यात्रु थिए। एक जना यात्रुको आतंकवादीहरूले हत्या नै गरे। त्यसमा आठ जना नेपाली यात्रु पनि थिए।
उक्त घटनापछि भारत सरकारले फिरौतीका रूपमा रिहा गरेका तीन जना आतंकवादीमध्ये मसूद अजहर एक हुन्।
अतिवादी संगठन 'जैश–ए–मोहम्मद' का प्रमुख अजहरले बुधबार बिहान पाकिस्तानमाथि भएको भारतीय सैन्य कारबाहीपछि वक्तव्य जारी गर्दै आफ्नो परिवारका कम्तिमा १० जना सदस्य र चार जना सहयोगी मारिएको बताएका छन्।
अन्तर्राष्ट्रिय समाचार संस्था बिबिसीका अनुसार अजहरले आफ्नी दिदी, भिनाजु, भतिजा, भतिजाकी पत्नी, भतिजी र पाँच जना बच्चा मारिएको बयान दिएका हुन्।
भारतीय सेनाले पाकिस्तान र पाकिस्तान–नियन्त्रित कश्मिरमा रहेका नौवटा आतंकवादी क्याम्पमा हमला गरेको जनाएको छ। ती क्याम्पमा जैश–ए–मोहम्मद, लश्कर–ए–तैयबा र हिज्बुल मुजाहिद्दिनका लडाकूलाई प्रशिक्षण दिने गरिएको भारतीय सेनाको दाबी छ।
मसूदको बयानअनुसार पाकिस्तानको बहावलपुरस्थित सुभान अल्लाह मस्जिदमा भएको हमलामा उनका नातेदारहरू मारिएका हुन्।
मसूदको जन्म बहावलपुरमै भएको थियो। उनी अहिले पनि त्यही ठाउँमा कडा सुरक्षाबीच बस्दै आएको दाबी गरिन्छ। लाहोरबाट ४०० किलोमिटर दुरीमा रहेको बहावलपुर पाकिस्तानको १२औं ठूलो सहर हो।
मसूद अजहर नेतृत्वको जैश–ए–मोहम्मदको स्थापना 'आइसी–८१४' जहाज अपहरणपछि भएको हो। मसूदले जहाज अपहरणपछि भारतीय जेलबाट रिहा भएर सन् २००० मा यो संगठन स्थापना गरेका थिए। त्यसयता भारतमा भएका विभिन्न आतंकवादी हमलामा उनको संलग्नता रहेको मानिन्छ।
खासगरी सन् २००१ को संसद भवन हमला, २०१६ को पठानकोट आक्रमण र २०१९ को पुलवामा हमलामा उनको हात रहेको दाबी गरिन्छ। पुलवामा हमलामा ४० जना सैनिकको ज्यान गएको थियो।
भारतले बुधबार बिहान गरेको हवाई हमलामा २६ जना नागरिकको मृत्यु भएको र ४६ जना घाइते भएको पाकिस्तानले जनाएको छ। त्यस्तै, भारतले पनि सीमापारिबाट भएको गोलाबारीमा १० जना भारतीय नागरिक मारिएको र ३२ जना घाइते भएको बताएको छ।
भारतले यो हवाई आक्रमणलाई जम्मू-कश्मिरको पहलगाममा अप्रिल २२ तारिखका दिन भएको आतंकवादी हमलाको जबाफ भनेको छ। उक्त हमलामा एक नेपालीसहित २६ जनाको ज्यान गएको थियो।
पहलगाम घटनामा पाकिस्तानको भूमिका रहेको दाबी गर्दै त्यसको जबाफमा 'अपरेसन सिन्दुर' चलाएर आतंकवादी संगठनका अड्डालाई लक्ष्य गरी आक्रमण गरिएको भारतीय विदेश मन्त्रालयले बताएको छ।
भारतीय सेनाकी कर्नेल सोफिया कुरैशीले बुधबार राति १:०५ देखि साढे १ बीच पाकिस्तानी भूभागमा मिसाइल आक्रमण गरिएको जानकारी दिइन्।
भारतीय विदेश मन्त्रालयका सचिव विक्रम मिश्रीले कश्मिरको सामान्य अवस्थालाई खलल पार्ने उद्देश्यले आतंकवादीहरूले पर्यटकलाई लक्ष्य गरेर आक्रमण गरेको बताएका छन्। उनले कश्मिरमा भएको आक्रमणमा पाकिस्तानको भूमिका रहेको प्रमाण भारतसँग रहेको पनि दाबी गरेको अन्तर्राष्ट्रिय समाचार संस्था रोयटर्सले लेखेको छ।
'पहलगाम आक्रमणको जिम्मेवारी रेसिस्टेन्ट फ्रन्ट (आरटिएफ) भनिने समूहले लिएको छ। यो समूह लश्कर-ए-तैयबासँग जोडिएको छ। त्यसैले पाकिस्तानको सम्बन्ध स्पष्ट रूपमा स्थापित भएको छ,' उनले भनेका छन्।
पहलगामको आतंकवादी आक्रमणबारे विश्वव्यापी चिन्ताका बाबजुद पाकिस्तानले आफ्नो भूमिबाट सञ्चालित आतंकवादी सञ्जाल नष्ट गर्न कुनै कारबाही नचलाएकाले पनि उसको भूमिका प्रष्ट हुने मिश्रीले बताएका छन्।
पाकिस्तानले भारतीय आक्रमणको जबाफ दिने भनिसकेको छ। उसले भारतीय पक्षले हानेका पाँचवटा फाइटर जेट खसालेको दाबी गरेको छ। फ्रान्समा निर्मित तीनवटा राफेल विमान र रूसमा बनेका दुइटा लडाकू जहाज खसालेको पाकिस्तानले दाबी गरेको समाचार संस्था रोयटर्सले जनाएको छ।
विमान खसालेको पाकिस्तानी दाबीबारे भारतले कुनै प्रतिक्रिया दिएको छैन। यो पुष्टि भयो भने, भारतीय सेनाका लागि दशकौंपछिको सबभन्दा ठूलो क्षति हुनेछ। राफेल लडाकू विमान सेनाको आधुनिकीकरण गर्ने योजनाअन्तर्गत भारतले किनेको हो। भारतीय वायुसेनासँग ३६ वटा राफेल लडाकू विमान छ।
भारतीय विदेशमन्त्री जयशंकर, गृहमन्त्री अमित शाह लगायतले सामाजिक सञ्जालमा लेख्दै आतंकवादविरूद्ध 'अपरेसन सिन्दुर' चलाइएको बताएका छन्।
आक्रमणपछि दुवै देशका विभिन्न क्षेत्रका विद्यालय बन्द गरिएका छन्। पाकिस्तानमा हवाई आक्रमणपछि अन्तर्राष्ट्रिय उडानहरू प्रभावित भएका छन्। धेरै एसियाली एयरलाइन्सले युरोप जाने र फर्कने उडान रद्द गरेको रोयटर्सले जनाएको छ।
खासगरी ताइवान, दक्षिण कोरिया, थाइल्यान्ड, भियतनामका विभिन्न उडान र भारतीय एयरलाइन्सहरू एयर इन्डिया, इन्डिगो, स्पाइसजेट लगायतका विमानले उडान रद्द गरेका छन्। सिंगापुर एयरलाइन्स, ब्रिटिस एयरवेज, फिनएयर, एयरोफ्लोट जस्ता एयरलाइन्सले पनि रूट परिवर्तन गरेका छन्।
भारतले गरेको आक्रमणबारे संयुक्त राष्ट्रसंघ, अमेरिका र चीनले प्रतिक्रिया जनाइसकेका छन्।
संयुक्त राष्ट्रसंघले दुवै देशलाई संयम अपनाउन आग्रह गरेको छ भने चीनले आक्रमणलाई खेदजनक भनेको छ। चीनले यो घटनालाई नजिकबाट नियालिरहेको भन्दै दुवैलाई संयम अपनाउन आग्रह गरेको छ।
अमेरिकी राष्ट्रपति डोनाल्ड ट्रम्पले आक्रमण बन्द हुने आशा व्यक्त गरेका छन्। उनका विदेशमन्त्री मार्को रूबिओले भने घटनालाई नजिकबाट नियालिरहेको बताएका छन्।
