नेपाल बार एसोशिएसनका नवनिर्वाचित अध्यक्ष विजयप्रसाद मिश्रले संविधान संशोधनको काममा पनि योगदान पुर्याउने बताएका छन्।
निर्वाचनको मतपरिणाम बिहीबार सार्वजनिक भएसँगै सञ्चारकर्मीहरूसँग प्रतिक्रिया दिँदै उनले संविधान संशोधनमा योगदान पुर्याउने बताएका हुन्।
त्यस्तै आफूले स्वच्छ न्यायपालिकाका लागि काम गर्ने पनि उनले बताए।
‘संविधान संशोधनमा पनि योगदान पुर्याइनेछ,’ उनले भने, ‘स्वच्छ न्यायपालिका मुलुकको विकासका लागि आवश्यक छ। त्यसको लागि हामी सधैं तत्पर रहनेछौं।’
वरिष्ठ अधिवक्ता मिश्र पाँच हजार ५२ मत ल्याएर अध्यक्ष पदमा निर्वाचित भएका हुन्।
नेपाल बार एशोसिएसनमा नेपाली कांग्रेस र नेकपा (एमाले) निकट कानुन व्यवसायी संगठन तथा नेकपा (माओवादी केन्द्र) र रास्वपानिकट कानुन व्यवसायी संगठनबीच गठबन्धन थियो।
कांग्रेस-एमाले गठबन्धनबाट अध्यक्षमा मिश्रसहित प्यानल नै निर्वाचित भएको हो।
अध्यक्षमा माओवादी-रास्वपा गठबन्धनका उम्मेदवार रमनकुमार श्रेष्ठले दुई हजार छ सय २१ मत ल्याएका छन्।
कांग्रेसनिकट कानुन व्यवसायीहरूले अध्यक्षसहित १२ पद र एमालेनिकट कानुन व्यवसायीहरूले महासचिवसहित १२ पदमा उम्मेदवारी दिएका थिए।
महासचिवमा केदारप्रसाद कोइराला निर्वाचित भएका छन्। उनले ४८७४ मत ल्याए। उनका प्रतिस्पर्धी यज्ञमणि न्यौपानेले २३६७ र हरिशरण कार्कीले २४० मत ल्याएका छन्।
