काठमाडौं महानगरपालिकाकी उपप्रमुख सुनिता डंगोलले नगर प्रहरी प्रमुख राजु पाण्डेलाई प्रमुख र उपप्रमुख दुवैसँग उत्तिकै जबाफदेही हुनुपर्ने बताएकी छन्।
बिहीबार प्रमुख प्रशासकीय अधिकृत सरोज गुरागाईंलाई कार्यकक्षमा रोक्न मेयर बालेन शाहले आदेश दिएको भन्दै राजु पाण्डे नेतृत्वको नगर प्रहरी टोलीले गुरागाईंलाई महानगर कार्यालयको गेटमै रोक्न प्रयास गरेको थियो।
राजु पाण्डेले मेयर बालेनको आदेश पालना गरेको भनेपछि उपप्रमुख डंगोलले उनलाई लिखित आदेश छ? भनेर प्रश्न गरेकी थिइन्।
'लिखित आदेश छ? छ भने देखाउनुहोस्,' उनले राजु पाण्डेलाई सोधिन्।
जबाफमा पाण्डेले मौखिक आदेश मात्र भएको बताए।
'तपाईं प्रमुखसँग जति जबाफदेही हुनुहुन्छ, उपप्रमुखसँग पनि उत्तिकै हुनुहुन्छ,' उनले प्रश्न गर्दै भनिन्, 'आदेश दिने हो भने लिखित हुनुपर्यो नत्र मौखिक हो भने आफूले आएर भन्नुपर्यो।'
यस्तै उपप्रमुख डंगोलले पाण्डेलाई भिडन्त नगर्ने हो भने व्यवस्थापनमा लाग्नुपर्ने बताइन्।
'भिडन्त नगर्ने हो भने व्यवस्थापन गर्नुपर्यो, त्यो व्यवस्थापन गर्नको लागि उपप्रमुखको हैसियतले व्यवस्थापन गर्न निर्देशन दिइसकेँ। तर केही कुरामा अड्किनुभएको छ भने प्रमुख आएर यहाँ सबैलाई जबाफ दिनुपर्यो,' उनले भनिन्।
यी पनि पढ्नुहोस्:
महानगरमा हाजिर भएपछि गुरागाईंले भने– कर्मचारी र श्रमिकहरूलाई तलब खुवाउन भोलि नै चेक काट्छु
