जनता समाजवादी पार्टी नेपालका अध्यक्ष उपेन्द्र यादव नगएपछि प्रधानमन्त्री निवास बालुवाटारमा बसेको सत्ता गठबन्धन दलहरूको बैठक अघि बढ्न सकेन।
सत्तारूढ दलको बैठक मंगलबार दिउँसो बालुवाटार बोलाइएको थियो।
बैठकमा नेपाली कांग्रेसका सभापति शेरबहादुर देउवा, प्रधानमन्त्री तथा नेकपा (एमाले) का अध्यक्ष केपी शर्मा ओली, एमाले वरिष्ठ उपाध्यक्ष ईश्वर पोखरेल, जनता समाजवादी पार्टीका अध्यक्ष अशोक राई, जनमत पार्टीका अध्यक्ष सिके राउत, नागरिक उन्मुक्ति पार्टीकी अध्यक्ष रञ्जिता श्रेष्ठ, लोकतान्त्रिक समाजवादी पार्टीका अध्यक्ष महन्थ ठाकुरसहित नेता उपस्थित थिए।
तर उपेन्द्र यादवले कार्यव्यस्ता कारण आउन नसक्ने खबर पठाएपछि बैठक एजेन्डामै प्रवेश नगरेको नाउपा अध्यक्ष रन्जिता श्रेष्ठले जानकारी दिइन्।
‘उपेन्द्र यादव नआएकाले बैठक अघि बढेन। बैठक बस्नासाथ सकिएकाले अरू विषयहरू पनि उठेन,’ उनले भनिन्।
उनका अनुसार सत्तापक्षीय दलको बैठक बुधबार बिहान ११ बजे पुनः बस्नेछ।
जनता समाजवादी पार्टी नेपालले सरकारले जारी गरेको भूमिसम्बन्धी अध्यादेशमा विरोध जनाइरहेको छ। भूमिसम्बन्धी अध्यादेश फिर्ता हुनुपर्ने उसको अडान कायमै छ।
सरकारले भूमिसम्बन्धी अध्यादेश संसदको कार्यसूचीमा राखेको छैन। बाँकी पाँच अध्यादेश प्रतिनिधि सभाबाट पारित भइसकेका छन् भने राष्ट्रिय सभामा विचाराधीन छ।
भूमिसम्बन्धी अध्यादेश सरकारले निष्क्रिय गराउने तयारी गरिरहेको जसपा नेपालका नेता मनिषकुमार सुमनले जानकारी दिए।
‘सरकारलाई भूमि अध्यादेश फिर्ता लिन लाज लाग्यो। संविधानको धारा ११४ (ग) अनुसार अध्यादेश निष्क्रय गराउने कुरा भएको छ। समझदारीमै त्यो तय भएको हो,’ सुमनले भने।
अध्यादेश जारी भएपछि लगत्तै बसेको संघीय संसदको दुवै सदनमा उक्त अध्यादेश पेस गर्नुपर्ने संवैधानिक व्यवस्था छ। दुवै सदनले स्वीकार नगरेमा अध्यादेश स्वतः निष्क्रिय हुनेछ।
राष्ट्रपतिबाट जुनसुकै बखत खारेज हुन सक्ने प्रावधान संविधानमा छ। संविधानको धारा ११४ को खण्ड (क) वा (ख) बमोजिम निष्क्रिय वा खारेज नभएमा दुवै सदनको बैठक बसेको साठी दिनपछि अध्यादेश स्वतः निष्क्रिय हुनेछ।
उनका अनुसार सर्वदलीय बैठकमा पार्टीका तर्फबाट राजकिशोर यादव जाने गरेको र मंगलबार अरू नै कुनै कारणले अनुपस्थित भएको हुनसक्ने बताए।
-1742801159.jpg)
