नेकपा (एमाले) निकट प्रेस चौतारी नेपालको जारी १० औं महाधिवेशनमा मतदानको समय नै नराखी निर्वाचन कार्यतालिका प्रकाशित गरिएको छ।
निर्वाचन आयोगले उम्मेदवारको अन्तिम नामावली सोमबार अपराह्न ४ः२० प्रकाशन गर्ने र त्यसको १० मिनेटमै परिणाम घोषणा गर्ने गरी तालिका निकालेको हो।
प्रेस चौतारीको अध्यक्ष गणेश पाण्डे र महासचिव चेतन अधिकारीलाई बनाउन पार्टी अध्यक्ष केपी शर्मा ओलीले निर्देशन दिइसकेका छन्।
अध्यक्ष ओलीको यही निर्देशन पालना गर्न निर्वाचन आयोगले मतदानको समय नै नराखी कार्यतालिका ल्याएको भन्दै आलोचना भएको छ।
प्रेस चौतारीको अध्यक्ष आकांक्षीमा राजेश राई पनि छन्।
ओलीले चैतको पहिलो साता नै जनसंगठन प्रमुख भानुभक्त ढकाल, प्रचार विभाग प्रमुख राजेन्द्र गौतम, प्रेस चौतारी अध्यक्ष गणेश बस्नेत लगायत नेताहरूलाई बोलाएर चौतारीको नेतृत्व सहमतिमा टुंग्याउन निर्देशन दिएका थिए।
अध्यक्ष ओलीको यही निर्देशनअनुरूप प्रचार विभाग प्रमुख गौतमसहित एमाले नेताहरू अहिले बन्दसत्रमा खटिएका छन्।
निर्वाचन आयोगले निकालेको सूचनाअनुसार दिउँसो १ बजे मतदाता नामावली प्रकाशन भएको छ।
दिउँसो १ः३० बजे दाबी विरोध, २ः३० बजे अन्तिम नामावली प्रकाशन भएको छ। दिउँसो २ः४५ बजेदेखि उम्मेदवार मनोनयन दर्ता र दिउँसो ४ बकजे उम्मेदवारको नामावली प्रकाशन हुनेछ।
निर्वाचन आयोगले दिएको जानकारी अनुसार अध्यक्षको उम्मेदवारको शुल्क ३५ हजार तोकिएको छ।
पदाधिकारीको २५ हजार र आयोगका अध्यक्षको १५ हजार उम्मेदवारी शुल्क तोकिएको छ। सदस्यहरूले उम्मेदवारी दिँदा १० हजार शुल्क बुझाउनुपर्नेछ।
