नेपाली कांग्रेसबाट बाजुराको स्वामीकार्तिक खापर गाउँपालिका उपाध्यक्ष पदमा पुल्तीसरा शाही उम्मेदवार हुने भएकी छन्।
शाहीलाई उपाध्यक्ष उम्मेदवार बनाउने बिहीबार निर्णय भएको कांग्रेस बाजुराले जनाएको छ।
शाही पार्टीमा प्रदेश सभा क्षेत्र १ की सदस्य छिन्।
२०७९ वैशाखमा भएको स्थानीय तह निर्वाचनमा उपाध्यक्षमा निर्वाचित कांग्रेसकी मैना जोशीको २०८० माघ ४ गते निधन भएसँगै यहाँ उपाध्यक्ष रिक्त छ।
मंसिर १६ गते यहाँ पनि उपनिर्वाचन हुँदैछ।
उपनिर्वाचनका लागि नेकपा (एमाले) बाट सुलोचना भण्डारी बुढा उम्मेदवार छिन्। उनी यसअघि कांग्रेसकी जोशीसँग पराजित भएकी थिइन्।
नेकपा (माओवादी केन्द्र) ले राजुकुमारी विकलाई उम्मेदवार बनाउने भएको छ। नेकपा (एकीकृत समाजवादी) र राष्ट्रिय स्वतन्त्र पार्टी लगायतले उम्मेदवार चयन गर्न बाँकी छ।
