राष्ट्रिय स्वतन्त्र पार्टीका सभापति रवि लामिछानेलाई मकैको खोयाले आक्रमण गरेको आरोपमा ३७ वर्षीय युवा सन्तोष रानाभाट प्रहरी नियन्त्रणमा छन्।
लमजुङको राइनास नगरपालिका– ८ घर भएका रानाभाट पोखरा बस्दै आएका छन्। केही समय अघिसम्म अटो चलाउने रानाभाट अहिले ड्राइभिङ पेशामा आबद्ध भएको प्रहरीले बताएका छन्।
उनले रवि लामिछानेलाई लक्ष्य गर्दै खोया आक्रमण गरेको आरोप अस्वीकार गरेको कास्की प्रहरी प्रमुख डिएसपी मोहन थापाले बताए।
‘हामीले सोधपुछ गर्दा उहाँ (रानाभाट) ले मकैको खोयाले प्रहार गरेको होइन, बसेको ठाउँबाट उछिट्टिएको भनेका छन्,’ थापाले भने, ‘परिचालित हो कि होइन भनेर छानबिन गर्न नियन्त्रणमा लिएका हौं।’
लामिछानेले भने आफूलाई मकैको खोयाले आक्रमण गरे पनि रानाभाटलाई कुनै कारबाही नगर्न प्रहरीलाई आग्रह गरेका छन्।
स्टेजमा मन्तव्य राखिरहेका बेला मकैको खोया मगाएर देखाउँदै लामिछानेले आफू जनताको ढुङ्गा, खोया, गाली, ताली सबै सहन तयार भएर नै राजनीतिमा आएकाले कारबाही नगर्न उनले आग्रह गरेका हुन्।
‘सुरक्षा निकायका साथीहरू, उहाँलाई छाडिदिनुहोला, ससम्मान घर पुर्याइदिनुहोला,’ लामिछानेले आफूतर्फ फालिएका मकैको खोया देखाउँदै मञ्चबाट भने, ‘उहाँलाई कुनै समस्या छ भने पनि समाधान गर्न सबैभन्दा अग्रपंक्तिमा बस्ने बाचा गर्छु।’
देशको अर्थतन्त्र ठिक नभएकाले सटरहरू बन्द भइरहेको बताइरहेका लामिछानेले खोया प्रहार भएपछि आफ्नो मन्तव्य परिवर्तन गरे।
रानाभाटलाई प्रहरीले पक्राउ गरेपछि उनले पोखराका सहकारी पीडितका समस्याबारे बोल्न थाले। जसमा लामिछाने पनि पीडकको साथमा रहेको पीडितहरूले आशंका गरिरहेका छन्।
प्रहरीका अनुसार रानाभाट पनि सूर्यदर्शन सहकारीका पीडित होइनन्।
पोखराका समस्याबारे साथीहरूले आफूलाई बताएको लामिछानेले जनाए। पोखराका नदीनाला दोहनदेखि एयरपोर्टसम्मका समस्या आफूलाई आएको भन्दै उनले सबैभन्दा धेरै समस्या सहकारी पीडितबाट आएको बताए।
‘धेरै साथीहरूले यहाँका समस्या बताएका छन्, नदीनाला दोहनका बारेमा बताएका छन्,’ उनले भने, ‘सहकारीबाट पीडित भएको समस्या सबैभन्दा बढी आएका छन्, ज्ञापनपत्र दिनुभएको छ, मैले बोकेर आएको छु।’
लामिछानेले भनेको ज्ञापन पत्र पोखरामा संचालनमा आएर हाल बन्द भएको सूर्यदर्शन बचत तथा ऋण सहकारी संस्थाका बचतकर्ताका हुन्। जुन सहकारीबाट १ अर्ब ३५ करोड ५३ लाख रुपैयाँभन्दा बढी अपचलन गरको आरोप लागेको छ। सहकारीका कोषाध्यक्ष कुमार रम्तेलबाहेक बाँकी १८ जना फरार छन्। यस सहकारीमा रकम बचत गरेका १८ हजार ७ सय जना सर्वसाधारणले रकम बचत गरेको पोखरा महानगरको छानबिन प्रतिवेदनमा उल्लेख छ।
उक्त सहकारीका बचतकर्ताले शुक्रबार साँझ लामिछानेलाई भेटेर ज्ञापनपत्र बुझाएका थिए।
सूर्यदर्शन सहकारी पीडित संघर्ष समितिका संयोजक किरण श्रेष्ठले शुक्रबार राति ८ बजेदेखि करिब १० बजेसम्म लामिछानेसँग भेटवार्ता गरेको बताए।
पोखराको जिरो किलोमिटरस्थित पार्टी कार्यालयमा २० जना जति सहकारी पीडित र लामिछानेबीच छलफल भएको थियो। त्यतिबेला पीडितले लामिछानेलाई ज्ञापनपत्र पनि बुझाएका थिए।
सहकारी पीडितले बुझाएको ज्ञापनपत्रमा सहकारीबाट लामिछानेको पनि संलग्नता देखिएको उल्लेख गरेका छन्।
‘कुनै समय तपाईं पनि यही सहकारीका सञ्चालक समितिका अध्यक्ष तथा संरक्षक गितेन्द्रबाबु राई (जिबी) र कोषाध्यक्ष कुमार रम्तेल सहपाठीका रूपमा सहकार्य गर्नुभएको र हालसम्म पनि यस सहकारी संस्थाको छानबिन समितिले तयार पारेको प्रतिवेदनमा पनि तपाईंको नाम उल्लेख भएको पाइएकाले छ यसकारण आज हामी तपाईं सामु छौं,’ ज्ञापनपत्रमा भनिएको छ।
सूर्यदर्शन बचत तथा ऋण सहकारी संस्थाका पीडित बचतकर्ताले लामिछानेलाई पहिलो पटक ज्ञापन पत्र बुझाएका होइनन्।
संघर्ष समितिका संयोजक किरण श्रेष्ठका अनुसार पार्टी सभापति लामिछाने र अन्य नेतालाई पटकपटक ज्ञापनपत्र बुझाएको बताए।
‘हामीले सभापति लामिछाने र माननीय तोसिमा कार्कीलाई पनि ज्ञापनपत्र बुझाइसकेका छौं,’ उनले भने, ‘पार्टीका यहाँका नेताहरूसँग पनि पटकपटक छलफल भए पनि समस्या समाधान हुने देखिएको छैन।’
यी पनि:
गण्डकी प्रदेशका सहकारीमा ५८ अर्ब बचत, कसले गर्छ नियमन?
ग्यालेक्सी टिभीका अध्यक्ष जिबी राई अझै फरार, सहकारीको १ अर्ब ३५ करोड अपचलन
