काठमाडौं महानगरपालिका-२८ का वडा अध्यक्ष भाइराम खड्गीले खुलामञ्चमा बनाइएका सटरहरु भत्काउने चेतावनी दिएका छन्। सेतोपाटीसँग कुरा गर्दै अध्यक्ष खड्गीले वडाको सम्पत्तीमा ठेकेदारले जबरजस्ती गर्न खोजेमा नसहने बताए।
'खुला मञ्च वडाको सम्पत्ति हो । यसमा भएको अनियमितता हामी सहदैनौं। मैले महानगरमा जानकारी समेत मागेको छु' उनले भने, 'महानगरका प्रवक्ताले यसलाई डोजर लगाएर भत्काउने भन्नुभएको छ। त्यस्तो भएन भने जनताले भत्काउँछन्।'
एक साताअघि सेतोपाटीसँग कुरा गर्दै महानगरका प्रवक्ता ईश्वरमान डंगोलले खुलामञ्चका सटर नभत्काइए डोजर लगाउने चेतावनी दिएका थिए।
वडा अध्यक्ष खड्गीले सटर राख्न दिन ठूलै चलखेल भएको बताए।
'ठूलै शक्तिको साथ पाएर मात्रै यो सटर बनेको हो। यहाँ सटरको भाडा महँगो लिइएको र गैर कानुनी ढंगले रकम असुलेको मैले थाहा पाएको छु', खड्गीले भने, 'खुला मञ्चका रुखहरु समेत रातको समयमा ढाल्ने काम भइरहेको छ। खुला मञ्च जोगाउन कुनै कसर बाँकी राख्दिनँ।'
आफ्नै वडामा सटर बन्दा समेत निर्वाचित प्रतिनिधिलाई थाहा नदिइनु रहस्यको विषय भएको उनले बताए।
पुरानो बसपार्कमा भ्यू टावर निर्माणको ठेक्का पाएको जलेश्वर स्वच्छन्द बिकोइ बिल्डर्सले खुलामञ्चमा सटर बनाएर भाडामा लगाएको हो। काठमाडौं महानगरपालिकाका अनुसार ठेकेदार कम्पनीलाई खुलामञ्चको बसपार्क व्यवस्थापन गर्ने जिम्मेवारी मात्र दिइएको हो।
व्यवस्थापन निम्ति एउटा क्यान्टिन, यात्रु प्रतीक्षालय र शौचालय बनाउने अनुमति दिइएको भए पनि ठेकेदार कम्पनीले भने ५५ भन्दा बढी सटर बनाएर भाडामा दिएको छ।
खुलामञ्च मास्दै सटर, महानगर भन्छ- थाहै छैन (भिडिओ)
