नेपाल कम्युनिष्ट पार्टी (नेकपा) का अध्यक्ष एवं पूर्वप्रधानमन्त्री पुष्पकमल दाहाल प्रचण्डले एक वर्षभित्र पार्टीको महाधिवेशन गरिसक्ने सहमति भएको बताएका छन्।
सोमबार आयोजित नेपाल कम्युनिष्ट कम्युनिष्ट पार्टीको स्थापनाको ७० औं वार्षिकोत्सव समारोहमा बोल्दै प्रचण्डले पार्टी एकता आजदेखि टुंगिएको दाबी गरे। उनले आठ महिनाभित्र जिल्ला र विदेशस्थित संगठनहरूको अधिवेशन गर्ने बताए।
‘अब एक वर्षभित्रमा महाधिवेशन गरिसक्नुपर्छ,’ उनले भने।
उनले जिल्ला समितिका अध्यक्ष र सचिवको टुंगो लागेसँगै पार्टी एकतामा फलामको ढोका फोडिएको बताए।
‘पार्टी एकता गरेर फलामको ढोका फोडिदिएका छौं,’ उनले भने, ‘पार्टी एकता टुंगियो भनेर अब गौरवसाथ भन्न पाइन्छ।’
पार्टीभित्र धेरै फोहोरमैला जम्मा भएकोले जनताको उर्जाबाटै फोहोर सफा गर्नुपर्ने उनले बताए।
‘एउटा नयाँ साँस्कृतिक क्रान्ति चाहिएको छ, भ्रष्टाचार र जालझेलकाविरुद्ध,’ उनले भने।
पार्टी एकता गरेर कम्युनिष्टहरु जे भन्छन् त्यही गर्छन् भन्ने उदाहरण कायम गरेको उनले बताए।
