आयोजक रुसलाई रोमाञ्चक खेलमा २–१ गोलले पराजित गर्दै मेक्सिको कन्फिडरेशन कपको सेमिफाइनल प्रवेश गरेको छ।
एक गोलले पछाडि परेको स्थितिलाई उल्टाउँदै मेक्सिको समूह ‘ए’ मा उपविजेता बन्दै सेमिफाइनल प्रवेश गरेको हो। यो समूहमा ३ खेल खेलेर समान ७ अंक बटुले पनि गोलअन्तरका आधारमा पोर्चुगल समूह विजेता बन्दै सेमिफाइनलमा प्रवेश गर्यो।
पोर्चुगलले पनि शनिवार भएको अर्को खेलमा न्युजिल्यान्डलाई ४–० ले हरायो। आयोजक रुसविरुद्ध २५ मिनेटमा मेक्सिको एक गोलले पछाडि परिसकेको थियो, जब एलेक्जेन्डर सामेडोभले पहिलो गोल गरे। तर, त्यसको ५ मिनेटमै मेक्सिको गोल फर्काउन सफल भयो। ३० मिनेटमा नेस्टोर अराउजोले गोल फर्काएका थिए। अर्को गोल ५२ मिनेटमा हिर्भिङ लोजानोले गरे।
मेक्सिकोले सेमिफाइनलमा समूह बीको विजेता टोलीसँग भिडन्त गर्नु पर्नेछ। यस्तै, पोर्चुगलको भिडन्त समूह बीको उपविजेतासँग हुनेछ।
