हङकङस्थित अन्तर्राष्ट्रिय वायुसेवा कम्पनी क्याथे प्यासिफिकले केही समयका लागि काठमाडौं–हङकङ उडान स्थगन गरेको छ।
क्याथेले यही भदौ ३० (सेप्टेम्बर १५) देखि असोज १३ (सेप्टेम्बर ३०) सम्मका लागि उडान रोकेको हो।
नेपालमा हालै भएका आन्दोलनपछि सुरक्षासम्बन्धी चिन्ताका कारण काठमाडौं–हङकङ उडान अस्थायी रूपमा स्थगन गरेको नागरिक उड्डयन प्राधिकरणले जनाएको छ।
एयरलाइन्सले आफ्ना कर्मचारीको सुरक्षामा सम्झौता नगर्ने नीति अन्तर्गत यो निर्णय गरेको प्राधिकरण एक कर्मचारीले जानकारी दिए।
'भदौ २४ (सेप्टेम्बर ९) मा एयरलाइन्सका केही क्रु सदस्य काठमाडौंस्थित होटेलमै आन्दोलनमा फसेको, उनीहरूको व्यक्तिगत सामान हराएको र होटलमा भौतिक क्षति पुगेको भन्ने सुनिएको छ। मानवीय क्षति नभए पनि धेरै सदस्य मानसिक आघातमा परेकाले तत्कालका लागि उडान रोकेको हो,' ती कर्मचारीले भने।
क्याथेले भने उडान स्थगनबारे कुनै कारण खुलाएको छैन।
एयरलाइन्सले असोज १४ (अक्टोबर १) देखि पुनः उडान सुरू गर्ने जनाएको छ। यस अवधिमा प्रभावित यात्रुले नि:शुल्क रूपमा टिकट पुनः बुकिङ वा फिर्ता पाउने व्यवस्था गरिएको छ।
-1746009348.jpg)
