जजिरा एयरवेजले आजबाट भैरहवास्थित गौतमबुद्ध अन्तर्राष्ट्रिय विमानस्थलमार्फत दैनिक उडान सुरू गरेको छ।
एयरवेजले भैरहवा–कुवेत दैनिक उडान सुरू गरेको हो। यसअघि जजिराको एयरबस ३२० निओले सोमबार, मंगलबार र शुक्रबार गरी सातामा तीन उडान गर्थ्यो। तर आजबाट भने सातामा सातै दिन उडान सुरू गरेको हो।
विमानस्थलका प्रवक्ता सुभास झाकाअनुसार जजिराले शुक्रबार (आज) बिहान पूर्व सेड्युलअनुसार नै उडान गरेको छ।
कुल एक सय ७४ यात्रु क्षमता भएको जहाजमार्फत दैनिक एक सय ६० जना भैरहवाबाट कुवेत उडिरहेका छन्। कुवेतबाट भैरहवा आउनेको संख्या सय जना हाराहारीमा रहेको प्रवक्ता झाले सेतोपाटीलाई बताए।
हालसम्म जजिरा एयरलाइन्सले कुवेत–भैरहवाका लागि १ सय १० वटा उडान सञ्चालन गरेको छ। जसमा कुवेतबाट भैरहवा विमानस्थलमा कुल ६ हजार ५ सय ८७ जना यात्रु भित्रिएका छन्। त्यस्तै भैरहवाबाट कुवेतका लागि कुल ७ हजार २ सय ४० जना बाहिरिएका छन्।
चाडपर्व नजिकिदैं गर्दा यात्रु अकुपेन्सी बढेकाले जजिराले उडान संख्या थपेको हो।
जेठ २ गतेदेखि गौतमबुद्ध अन्तर्राष्ट्रिय विमानस्थलमा जजिराले मात्र अन्तर्राष्ट्रिय उडान गरिरहेको छ।
