कोभिडबाट प्रभावित होटल उद्योग पुर्नरूत्थान र पर्यटन प्रवर्द्धनका लागि काठमाडौंमा एक दिने आतिथ्य सम्मेलन आयोजना हुने भएको छ।
होटल संघ नेपाल (हान) ले आगामी शनिबार सोल्टी होटलमा सम्मेलन आयोजना गर्न लागेको हो।
लामो समयदेखि तयारी गरिएको यो सम्मेलनमार्फत होटल क्षेत्रमा देखिएका, भोगिएका र भविष्यमा आउन सक्ने समस्याहरुको समाधान खोज्न सहयोग पुग्ने प्रकारका शत्रहरू सञ्चालन गरिने छन्।
कोभिड–१९ को महामारीबाट पुनरुत्थानका क्रममा रहेको व्यवसायलाई चलायमान बनाउन नयाँ तरिकाको बजारीकरण गरिनुका साथै केही नयाँ अभ्यासहरू प्रयोग गर्दै नेपाली होटल उद्योगको स्तरीयता कायम राख्न र समग्र पर्यटनको विकासका लागि यस सम्मेलनले केन्द्रीय भूमिका खेल्ने हानले बताएको छ।
सम्मेलनमा सम्बन्धित क्षेत्रका स्वदेशी तथा विदेशी विज्ञहरू सहभागी हुनेछन्। त्यस्तै होटलहरूमा प्रयोग हुने वस्तु, सेवा तथा सामग्रीहरू उपलब्ध गराउने कम्पनी तथा व्यवसायीहरूलाई समेटी वृहत प्रदर्शनी रहनेछ।
