गौतम बुद्ध अन्तर्राष्ट्रिय विमानस्थल बनाउन २५० चिनियाँ कामदार थपिँदै


भैरहवामा निर्माणाधीन गौतम बुद्ध अन्तर्राष्ट्रिय विमानस्थलको कामलाई तीव्रता दिन ठेकेदार कम्पनीले चीनबाट दक्ष कामदार थप गर्ने भएको छ।

ठेकेदार कम्पनी नर्थ वेष्टले कामलाई तीव्रता दिन  २५० कामदार ल्याउने तयारी अगाडि बढाएको आयोजना प्रमुख ओम शर्माले जानकारी दिए।

मधेस आन्दोलन, नाकाबन्दी र निर्माण सामग्रीको अभावमा निर्धारित समयमै सम्पन्न नहुने निश्चत भएको विमानस्थलमा  सन् २०१८ भित्रै भौतिक  संरचना निर्माण गरिसक्ने गरी काम अगाडि बढेकाे अधिकारीहरूले जनाएका छन्।

पछिल्लो दुई महिनादेखि निर्माण सामग्रीको आपूर्ति पर्याप्त मात्र होइन स्टक पनि रहेकोले इक्यूपमेन्ट र कामदार थप गर्न ठेकेदारलाई भनिएको र त्यसअनुसार काम अगाडि बढेको आयोजना प्रमुख शर्माले जानकारी दिए।

चिनियाँ ठेकेदार कम्पनीले चीनबाट थप २५० दक्ष कामदार ल्याउन भन्दै भिसाको लागि निवेदन दिएको र आफूले सिफारिस गरेर पठाएको शर्माले जानकारी दिए।

वर्षा अगाडि केही कामदार अाउने र बाँकी वर्षापछि अाउने शर्माकाे भनाइ छ।

 

 

 

 

Share:

© 2017 Setopati Sanchar Pvt. Ltd.