देशभित्र खपत गरी अतिरिक्त भएको विद्युत् दैनिक रूपमा औसतमा एक हजार मेगावाट निर्यात भइरहेको नेपाल विद्युत प्राधिकरणका कार्यकारी निर्देशक मनोज सिलवालले बताएका छन्।
प्राधिकरणका अनुसार चालू आर्थिक वर्ष २०८२/८३ को साउनदेखि हालसम्म करिब १५ अर्ब रूपैयाँ बराबरको विद्युत् निर्यात भएको छ।
नेपालले भारतीय ऊर्जा एक्सचेन्ज (आइएक्स)को डे–अहेड तथा रियल टाइम मार्केटमा प्रतिष्पर्धी दरमा बिजुली बिक्री गरिरहेको छ। साथै, दुई पक्षीय मध्यकालीन विद्युत् बिक्री सम्झौता बमोजिम हरियाणा र बिहार राज्यमा बिक्री गरिरहेको छ।
भारतको प्रसारण संरचनाको प्रयोग गरी बंगलादेशमा पनि दैनिक ४० मेगावाट विद्युत् निर्यात भइरहेको छ। भारतसँगको विद्युत् व्यापार भारतीय रूपैयाँ (भारू)मा र बंगलादेशसम्म अमेरिकी डलरमा हुने गरेको छ।
त्यसैले विद्युत् बिक्रीबाट सरकारलाई भारू र डलर आम्दानी भइरहेको छ। प्राधिकरणले भारत र बंगलादेश गरी ११६५ मेगावाट विद्युत् निर्यात स्वीकृति पाएको छ।
-1746009348.jpg)
