स्वतन्त्र ऊर्जा उत्पादकहरूको संस्था (इप्पान) ले नेपाल धितोपत्र बोर्ड(सेबोन)लाई जबाफ दिएको छ।
केही दिनअघि इप्पानका अधिकारीहरू आफैं सेबोन कार्यालय पुगेर बोर्ड अध्यक्ष सन्तोषनारायण श्रेष्ठलाई लिखित जबाफ दिएको इप्पानका अध्यक्ष गणेश कार्कीले बताए।
सेयर निस्कासन प्रक्रिया चाँडो गरिदिने भन्दै बोर्ड अध्यक्ष निकट व्यक्तिहरूले ५ देखि ७ प्रतिशत कमिसन मागेको आरोप इप्पानको कार्यसमिति सदस्यहरूले लगाउँदै आएका थिए।
केही समयअघि आइपिओ अनुमतिको पर्खाइमा रहेका ४३ कम्पनीलाई बोलाएर इप्पानले गरेको छलफलमा ४२ वटा कम्पनीले आफूहरूसँग बोर्डका अध्यक्षको नाम लिएर कमिसन मागिएको गुनासो गरेको सार्वजनिक भएको थियो।
यसपछि सेबोनले प्रमाणसहित आधिकारिक धारणा पठाउन इप्पानलाई पत्रचार गरेको थियो।
'सोही पत्रको जबाफ इप्पानले दिएको हो। हामीले अध्यक्षबाटै पैसा मागिएको गुनासो आएको भनेका होइनौं। साथीहरूले बिचौलियाले पैसा मागेको गुनासो गर्नु भएको हो। जबाफमा त्यहि लेखेका छौं,' अध्यक्ष कार्कीले भने।
सेयर निष्कासन अनुमति प्रक्रिया छिटो गरिदिन पनि इप्पानले आग्रह गरेको छ।
