गत असोज १० देखि १३ गतेसम्मको बाढीले क्षतिग्रस्त बनेको बिपी राजमार्गलगायत सडक र पुलहरूको निर्माणका लागि भौतिक पूर्वाधार तथा यातायात मन्त्रालयले यस आर्थिक वर्षलाई ६ अर्ब रुपैयाँ माग गरेको छ।
माघ मसान्तसम्मको उपलब्धी सुनाउँदै भौतिक पूर्वाधार तथा यातायात मन्त्री देवेन्द्र दाहालले बाढीबाट क्षति पुगेका सडक, पुल निर्माण गर्न २५ अर्बको स्रोत सुनिश्चितताको माग गरिएको बताएका हुन्।
यस आर्थिक वर्षका लागि ६ अर्बको बजेट निकासा गर्न अर्थ मन्त्रालय तथा गृह मन्त्रालयअन्तर्गतको राष्ट्रिय विपद् तथा पुनर्निर्माण प्राधिकरणमा अनुरोध गरिएको उनले बताएका छन्।
यस वर्षको मनसुनको बाढी पहिरोबाट क्षतिग्रस्त भएका संरचनाहरूको मर्मत–सुधार गरी दसैं, तिहार, छठअगावै यातायात सञ्चालन गरिएको मन्त्रालयले जानकारी दिएको छ।
असोजको बाढीयताका पाँच महिनामा पाँच वटा बेलिब्रिज बनेको मन्त्रालयले उल्लेख गरेको छ।
रामेछाप र सिन्धुली जिल्ला जोड्ने खुर्कोटस्थित सुनकोशी नदी पुल, अरनिको राजमार्गस्थित लिपिङ पुल, अरनिको राजमार्गकै खाँगदल पुल, उदयपुर र खोटाङ जोड्ने फोक्सिङटारस्थित सुनकोशी नदी पुल र धादिङ जिल्लास्थित आँखु खोलामा पुल यसबीचमा बनेको मन्त्रालयले बताएको हो।
ललितपुर र मकवानपुर जिल्ला जोड्ने कान्ति लोकपथस्थित बाग्ममती नदी पुल, पाँचथर जिल्लास्थित हेवा खोला पुल निर्माणाधीन अवस्थामा रहेको मन्त्रालयले बताएको छ।
त्यस्तै, इलाम जिल्लास्थित पुवा खोला पुल, इलामकै जोगमाई खोला पुल पनि निर्माणाधीन अवस्थामा रहेको मन्त्रालयले बताएको छ।
बाढीबाट क्षतिग्रस्त बिपी राजमार्गको समस्याग्रस्त खण्डहरूको मर्मत सुरू भइसकेको मन्त्रालयले बताएको छ। ती खण्डमा आवश्यकताअनुसार टेवा पर्खाल लगाउने, सडक सतहलाई उठाउने कार्य गर्न जनशक्ति तथा उपकरणहरू परिचालन गरिएको मन्त्रालयको भनाइ छ।
