मुलुकमा विगत चार वर्षदेखि वस्तु व्यापारतर्फ सबैभन्दा बढी कर तिर्ने भाटभटेनी सुपरमार्केटका सञ्चालक मीनबहादुर गुरूङले आफ्नो व्यावसायिक जीवनमा अनेक उतारचढाव आएको बताएका छन्।
कर दिवसका दिन उनलाई आज सरकारले सम्मान गरेको थियो।
व्यवसायी गुरूङले ठूलो क्षति भएको भाटभटेनी सुपरमार्केट आगलागीको घटनालाई 'स्वीट पेन' को रूपमा लिएको बताए।
सञ्चालक गुरूङ्ले आफूमाथि लागेका अनेक आरोप र क्षतिलाई सहर्ष स्वीकार गरेको उल्लेख गरे।
'मलाई कहिले कीर्ते भन्छ। कहिले जेल हालिन्छ। कहिले जलाइन्छ। मलाई स्वीट पेन भएको हो,' उनले भने।
उनले आफ्नो संस्थाले कर तिरेर बचेको नाफा दान दिन चाहेको र स्वास्थ्य क्षेत्रमा धेरै ठूलो सहयोग गरेको जानकारी दिए। भगवान कोइराला अस्पताल र टिचिङ अस्पताल लगायतका स्वास्थ्य संस्थाहरूमा भाटभटेनीले सहयोग गरेको पनि उनले बताए।
गुरूङले मूल्य अभिवृद्धि कर (भ्याट) सुरू हुने बेलामा आफू सबैभन्दा बढी खुसी भएको स्मरण गरे। तर, पछि अरूले गरेको गल्तीमा आफूले सजाय पाएको तितो अनुभव पनि सुनाए।
'त्यतिबेलाको कारोबार आम्दानीले मैले हर्जना तिर्न सक्ने अवस्था थिएन। अब म झन् मेहनत गरेर काम गर्नु पर्छ भन्ने भयो,' उनले भने।
उनले त्यसपछि थप मेहनत गरेको र अहिले त्यसको फलस्वरूप ठूलो सफलता मिलेको बताए। त्यतिबेला २ अर्बको कारोबार हुने भाटभटेनी अहिले ३३ अर्बको कारोबार गर्न सक्षम भएको उनले बताए।
ठूलो क्षतिले पनि उठाउन प्रेरित गर्यो
गुरुङले गत भदौ २३/२४ मा भएको आगलागीबाट ठूलो क्षति भएको बताए।
'विगतमा वर्षौं आन्दोलन हुन्थ्यो, अहिले एकै दिनमा ठूलो क्षति भयो। सबै बीमाले कभर गरेन,' उनले भने।
यति ठूलो क्षतिपछि पनि आफू उठ्नुपर्छ भनेर लागेको र थप मेहनत गरेको बताए।
'म डुब्दा बैंक डुब्छ, रोजगारी जान्छ भनेर पनि हो,' उनले भने।
भाटभटेनीले कुनै पार्टीलाई बिल्डिङ बनाइदिने भयो भनेर जलाइएको भनिए पनि उनले पार्टीलाई भवन बनाउने विषय आफ्नो व्यक्तिगत चासो भएको बताएका थिए। यद्यपि, उनले त्यही कारणले जलाइयो भन्नु आफ्नो गल्ती भएको महसुस गरेको उल्लेख गरे।
-1746009348.jpg)
