नेपालको सार्वजनिक ऋणभार २७ खर्ब ४३ अर्ब ३७ करोड रुपैयाँ नाघेको छ।
सार्वजनिक ऋण व्यवस्थापन कार्यालयका अनुसार, चालु आर्थिक वर्षको पहिलो दुई महिना (भदौ मसान्त) सम्ममा यो आँकडा पुगेको हो। गत असार मसान्तसम्म सार्वजनिक ऋण २६ खर्ब ७४ अर्ब ४ करोड रुपैयाँ थियो।
भदौ मसान्तसम्म कुल ऋणमध्ये आन्तरिक ऋण १२ खर्ब ८१ अर्ब ८२ करोड र बाह्य ऋण १४ खर्ब ६१ अर्ब ५४ करोड रुपैयाँ रहेको छ।
नेपालको कुल गार्हस्थ उत्पादन (जिडिपी) को आधारमा सार्वजनिक ऋण ४४.९२ प्रतिशत पुगेको छ। यसमा आन्तरिक ऋण २०.९९ प्रतिशत र बाह्य ऋण २३.९३ प्रतिशत रहेको छ।
नेपाली मुद्रा कमजोर हुँदा बाह्य ऋणमाथि ठूलो भार थपिएको छ। भदौमा विनिमय दरमा आएको उतारचढावले मात्रै ५५ अर्ब २३ करोड रुपैयाँ दायित्व थपिएको छ, जसले गर्दा सार्वजनिक ऋण ह्वात्तै बढेको हो।
सरकारले दुई महिनामा ७९ अर्ब १५ करोड रुपैयाँ नयाँ ऋण उठाएको छ। यसमध्ये ७० अर्ब आन्तरिक ऋण र ९ अर्ब १५ करोड बाह्य ऋण प्राप्त भएको छ।
चालु आर्थिक वर्षमा सरकारले ५ खर्ब ९५ अर्ब ६६ करोड रुपैयाँ ऋण उठाउने लक्ष्य राखेको छ।
सोही अवधिमा सरकारले ६५ अर्ब ७ करोड रुपैयाँ ऋण भुक्तानी पनि गरेको छ। यसमा आन्तरिक ऋणतर्फ ५६ अर्ब ४० करोड र बाह्य ऋणतर्फ ८ अर्ब ६७ करोड साँवा भुक्तानी गरिएको छ।
ब्याजतर्फ भने आन्तरिक ऋणमा ११ अर्ब २७ करोड र बाह्य ऋणमा २ अर्ब ३२ करोड खर्च भएको छ। सार्वजनिक ऋण सेवामा यस वर्ष ४ खर्ब ११ अर्ब १ करोड रुपैयाँ बजेट विनियोजन गरिएकोमा भदौ मसान्तसम्म ७८ अर्ब ६७ करोड रुपैयाँ खर्च भइसकेको छ।
-1746009348.jpg)
