पछिल्लो आर्थिक वर्ष २०८१/८२ मा अर्जेन्टिना, ब्राजिल र कतारबाट हुने वस्तु आयात अत्यधिक मात्रामा बढेको छ।
भन्सार विभागको तथ्यांक अनुसार अर्जेन्टिनासँगको आयात आठ गुणाले बढेर ९९ अर्ब ३० करोड रूपैयाँ पुगेको छ।
आर्थिक वर्ष २०८०/८१ मा अर्जेटिनाबाट जम्मा १२ अर्ब ३८ करोड रूपैयाँको सामान आयात भएको थियो।
त्यस्तै ब्राजिलबाट हुने आयात तीन गुणाले बढेको छ। आर्थिक वर्ष २०८०/८१ मा तीन अर्ब ९४ करोड रूपैयाँ बराबरको मात्रै आयात भएको थियो। तर, पछिल्लो वर्ष २०८१/८२ मा भने ११ अर्ब ८४ करोड पुगेको छ।
कतारबाट हुने आयात पनि दोब्बरले बढेको छ। आर्थिक वर्ष २०८०/८१ मा ४ अर्ब १६ करोड रूपैयाँ बराबरको भएकोमा २०८१/८२ मा ९ अर्ब १४ करोड रूपैयाँ बराबरको भएको छ।
अर्जेन्टिना र ब्राजिलसँग यति धेरै आयात बढ्नुको कारण अर्धप्रशोधित कच्चा तेलको योगदन छ। अर्जेन्टिनाबाट ८८ अर्ब ९० करोड रूपैयाँ बराबरको अर्धप्रशोधित भटमासको तेलको आयात भएको छ।
८ अर्ब ८९ करोड रूपैयाँको अर्धप्रशोधित सूर्यमुखी तेलको आयात भएको छ। यसबाहेक एक अर्ब ४२ करोड रूपैयाँ बराबरको मकैको आयात भएको छ। अन्य वस्तुहरूको आयात नगन्य मात्रामा छ।
ब्राजिलबाट पनि करिब १० अर्ब रूपैयाँ बराबरको अर्धप्रशोधित भटमासको तेलको आयात भएको छ। त्यस्तै एक अर्ब २३ करोड रूपैयाँ बराबरको मकै आयात भएको छ।
नेपालले गत वर्ष अत्यधिक मात्रामा प्रशोधित खाने तेलको निर्यात भारतमा गरेको थियो। तर यस्तो तेलहन उत्पादन नेपालमा न्यून मात्रामा हुने भएको कारण आयात गरेर प्रशोधन गर्ने गरेको छ।
गत वर्ष कतारबाट पनि उल्लेख्य मात्रामा आयात बढेको छ। कतारबाट सबैभन्दा धेरै परिमाणमा रसायनिक मलको आयात भएको छ।
नौ अर्ब रूपैयाँ बराबरको जम्मा आयातमा ७ अर्ब रूपैयाँ बराबरको मल मात्रै आयात भएको भन्सार विभागले जनाएको छ।
-1754812957.jpeg)
-1746009348.jpg)
