उपप्रधानमन्त्री एवं अर्थमन्त्री विष्णुप्रसाद पौडेलले संघ सरकार संघीय महत्वका आयोजना र कार्यक्रममा केन्द्रित हुनुपर्नेमा गम्भीर रहेको बताएका छन्।
आगामी आर्थिक वर्षको बजेट निर्माण सम्बन्धमा अर्थ समितिमा भएको छलफलका क्रममा सांसदहरूले उठाएका प्रश्नको जबाफ दिँदै उनले सांसदहरूले संघले संघीय महत्वका आयोजना र कार्यक्रममा केन्द्रित हुनुपर्छ भन्ने कुरामा जोड दिएको र त्यसमा सरकार गम्भीर रहेको बताए।
उनले तीन तहको सरकारको प्रबन्ध गरिएको र तीन तहको सरकारको अधिकारको सूची र त्यसमा साझा सूचीहरू पनि निर्धारण गरिएको उल्लेख गर्दै संस्थागत गरिएको प्रबन्ध अनुशरण गर्न केही कठिन भएको बताए।
उनले संविधानअनुरूप अभ्यस्त हुन केही समय लागेको भए पनि अब समय नलाग्ने बताए।
उपप्रधानमन्त्री पौडेलले भने, ‘अफ्ठ्यारो कहाँनेर परेको छ भने हामीले संविधानमा एउटा प्रबन्ध गर्यौँ। तीन तहको सरकारको प्रबन्ध गर्यौँ। तीन तहको सरकारको अधिकारको सूची र त्यसमा साझा सूचीहरू पनि निर्धारण गर्यौँ। पालिका, प्रदेश र संघले के गर्ने? भन्ने हामीले संस्थागत गरेका छौँ। संस्थागत गरिएको प्रबन्ध अनुशरण गर्न हामीलाई अलिकति उकालो उकालो भइरहेको छ। अहिलेसम्मको अनुभवले त्यो बताउँछ। संविधानअनुरूप अभ्यस्त हुन हामीलाई समय पनि लाग्यो। हामी संघले संघीय महत्वका आयोजना र कार्यक्रममा केन्द्रित हुनुपर्छ भन्ने कुरामा यहाँहरूको जोड छ। यसलाई गम्भीरतापूर्वक लिएको छु।’
उपप्रधानमन्त्री पौडेलले आगामी आर्थिक वर्षको बनेटबाट सांसदहरूले महत्वपूर्ण सुझाव दिएको र सुझावहरूलाई समेटेर बजेट निर्माण गर्ने प्रतिबद्धता जनाए।
परिस्थिति असहज भएकाले बजेट निर्माण गर्दा बजेटको साइज, विनियोजन कौशलता र कार्यान्वयनको सुनिश्चितताका साथै प्राथमिकतका निर्धारण गर्ने क्रममा छलफलको विषय बनाएर अघि बढ्ने बताए। —न्युज एजेन्सी नेपाल
