नेपाल उद्योग वाणिज्य महासंघले शुक्रबारको आन्दोलन तथा प्रदर्शनका क्रममा सर्वसाधारणको पेसा व्यवसाय गर्ने नैसर्गिक अधिकार हनन हुनुका साथै निजी तथा सार्वजनिक सम्पत्तिमाथि आक्रमण, लुटपाट, आगजनीजस्ता घटनाप्रति ध्यानाकर्षण गराएको छ।
काठमाडौंमा चैत १५ गते भएको प्रदर्शनका क्रममा भएको मानवीय तथा भौतिक क्षतिको महासंघले भर्त्सना गर्दै हिंसात्मक गतिविधि नियन्त्रण गर्न आग्रह गरेको छ।
आन्दोलनका क्रममा ज्यान गुमाएकाहरूलाई श्रद्धाञ्जली दिदै महासंघले शोकाकुल परिवारजनप्रति समवेदना व्यक्त गरेको छ।
साथै, घाइतेहरूको शीघ्र स्वास्थ्य लाभको कामनासमेत गरेको छ।
महासंघले व्यवसायिक प्रतिष्ठान, मिडिया हाउस, कार्यालय तथा व्यापारिक गतिविधिहरूमाथि भएको आक्रमण, तोडफोड र आगजनीको कडा शब्दमा निन्दा गरेको छ।
यस किसिमका घटनाबाट लाखौंको क्षति भएको उल्लेख गर्दै महासंघले पीडित व्यवसायी तथा संस्थाहरूलाई क्षतिपूर्ति उपलब्ध गराउन माग गरेको छ।
संविधानले शान्तिपूर्ण रूपमा आफ्ना माग राख्ने अधिकार प्रदान गरे पनि हिंसात्मक प्रदर्शन, आगजनी, लुटपाट तथा सार्वजनिक र निजी सम्पत्तिमाथि आक्रमण अस्वीकार्य रहेको महासंघको धारणा छ।
सार्वजनिक सुरक्षाको प्रत्याभूति गर्न सरकार र सम्बन्धित निकायलाई आग्रह गर्दै महासंघले यस्ता घटनाको पुनरावृत्ति रोक्न आवश्यक कदम चाल्नुपर्ने माग गरेको छ।
