लामो सार्वजनिक विदा सकिएपछिको बजारमा मंगलबार ६२ अंकको सुधार देखिएको छ।
नेप्से परिसूचक ६२.२९ अंकले बढेर २५७१ विन्दुमा आइपुगेपछि बजार बन्द भएको हो।कारोबार रकममा पनि सुधार आएको छ।
आइतबार दुई अर्ब ६६ करोड रूपैयाँको सेयर कारोबार भएकोमा मंगलबार चार अर्ब ५७ करोड रूपैयाँको कारोबार भएको हो।
केही दिनदेखि सेयर बजार परिसूचक नेप्से एक वर्षकै न्यूनतम विन्दु २५ सयको आसपास आएपछि सुधार देखिन थालेको हो।
भदौ २३ र २४ को जेनजी आन्दोलन र असोज दोस्रो सातामा आएको बाढीको कारण सेयर बजारमा पनि प्रभाव परिरहेको थियो।
यसैबीच विवादित छविका व्यवसायी दुर्गा प्रसाईंले समेत आन्दोलन गर्ने खबर बाहिरीएको थियो। यसले पनि बजार घटाउन सहयोग पुगेको थियो।
तर, हालै उपत्यकाका तीनै जिल्लाका प्रमुख जिल्ला अधिकारीहरूसँगको भेटमा प्रसाईंले कात्तिकभर आन्दोलन गर्ने आफ्नो योजना नभएको बताएको खबर बाहिरीएसँगै बजार सुधारमा जाने अपेक्षा आइतबार साँझबाटै गरिएको थियो।
यसबाहेक अहिले लघुवित्त, बैंक, विकास बैंक लगायतका समूहका धेरै कम्पनीको मूल्य न्यून तहमा आएकोले पनि बजारले वृद्धिको बाटो समात्ने अपेक्षा गरिएको छ।
बजारलाई केहीसमय अघिसम्म प्रभाव पारिरहेका विषयहरू साम्य हुँदै गएकोले पनि बजार बढ्दै जाने अपेक्षा गरिएको छ।
विशेष गरेर अधिकांश जीवन बीमा कम्पनीको तोकिएको पाँच अर्ब चुक्ता पुँजी पुगेपछि मूल्य निकै घटेको छ।
यस्तोमा यो क्षेत्रमा सुधारको सम्भावना रहेको ब्रोकरहरू बताउँछन्।
त्यस्तै, भदौ २४ को तोडफोड र आगजनीले बीमा दाबी बढ्ने भन्दै निर्जीवन बीमा कम्पनीको मूल्य पनि उच्चले घटेका थिए।
यो घटनाको कारण मूल्य निकै घटेका यी कम्पनीमा यस्तो प्रभाव समायोजन भइसकेकोले यिनमा पनि सुधार देखिन थालेको छ।
मंगलबार बजारमा लगानीकर्ताहरू आशावादी देखिँदै कारोबारमा आएकामध्ये व्यापारमुलकबाहेक सबै समूहगत परिसूचक बढेका छन्।
कारोबारमा आएका तीन सय १४ लगानी उपकरणमध्ये दुई सय ७२ को मूल्य बढेको छ, ३२ को घटेको छ भने बाँकीको स्थिर छ।
बजार बढेपनि केही कम्पनीको सेयरमा भने लगानीकर्ताहरूले ध्यान दिनपर्ने देखिन्छ। भदौ २३ र २४ को प्रदर्शनसँगै हायात होटलले बन्द भएकै सूचना सार्वजनिक गरेको छ।
सेयर बजारमा सूचीकृत यो कम्पनीसँगै पर्यटन समूहका कम्पनीहरूमा लगानीकर्ताहरू सशंकित नै छन्।
आन्तरिक पर्यटकको चाप बढिरहेपनि बाह्य पर्यटकको संख्या बढिसकेको छैन। यसले पनि यो क्षेत्रमा प्रभाव पारेको हो।
लामो समयदेखिको विद्युत महशुल विवाद फेरि चर्किन थालेको छ।
यससँगै सेयर बजारमा सूचीकृत शिवम सिमेन्ट, घोराही सिमेन्ट र सोनापुर मिनिरल्स एण्ड आयलको विद्युत कटौती गरिएको छ।
यी उद्योगको उत्पादन अहिले बन्द अवस्थामा छ। यसले पनि यी कम्पनीको मूल्यमा तत्कालको लागि प्रभाव पर्ने देखिएको छ।
-copy-1761394385.jpg)
-1746009348.jpg)
