आफ्नो कार्यकाल सकेर जाने क्रममा गभर्नर महाप्रसाद अधिकारीले तथ्यमा आधारित भएर सजगतापूर्वक मौद्रिक नीति तर्जुमा गर्न सकिएकोले नै अहिले समकक्षी मुलुकहरूको तुलनामा नेपाल बलियो अवस्थामा आएको बताएका छन्।
चैत २४ गते सार्वजनिक बिदा भएसँगै गभर्नर अधिकारी आज कर्मचारीहरूसँग बिदाबारी भएका छन्।
सो क्रममा राष्ट्र बैंकमा आयोजित कार्यक्रममा गभर्नर अधिकारीले भने, 'विश्वव्यापी कोभिड महामारी, रूस र युक्रेनबीचको तनावका कारण सिर्जित उच्च मूल्यवृद्धिको सामना गर्नुपर्यो। यस्तो चुनौतीका बावजुद यस बैंकले लिएको सजग र समयानुकूल उपयुक्त नीतिगत व्यवस्थाको कारण समग्र आर्थिक स्थायित्व कायम हुन सकेको छ।'
उनले अहिले मुलुकको बाह्य क्षेत्र सुदृढ रहेको, वित्तीय क्षेत्रको पुँजी पर्याप्तता तथा तरलता नियामकिय आवश्यकताभन्दा माथि रहेको, ब्याजदर व्यवसायमैत्री रहनुका साथै कोभिडपश्चात चुलिएको मूल्यवृद्धि क्रमशः कम हुँदै लक्ष्यभित्र रहेको बताए।
राष्ट्र बैंकले मौद्रिक नीति तर्जुमा गर्दा सजगतापूर्वक तथा तथ्यमा आधारित भएर लिएका उपायहरूले अर्थतन्त्रलाई लयमा राख्न सकेको र समकक्षी देशहरूको तुलनामा बलियो अवस्थामा राख्न मद्दत गरेको दाबी गरेका छन्।
उनले आफ्नो कार्यकालको दोस्रो वर्ष पुग्दै गर्दा नेपाल राष्ट्र बैंक नेतृत्वमाथि प्रहार गरेर केन्द्रीय बैंकको स्वायत्ततामाथि नै ठाडो हस्तक्षेप भएको र यसको विरूद्ध सबै क्षेत्रबाट भएको खबरदारीको प्रसंशा समेत गरे।
गभर्नरको कार्यकालमा भएका कामहरूको दस्तावेज राख्ने उद्देश्यले राष्ट्र बैंकले पहिलो पटक प्रकाशित गरेको प्रतिवेदन समेत कार्यक्रममा सार्वजनिक गरिएको छ।
गभर्नर अधिकारीको कार्यकालको पाँच वर्षको अवधिमा ११ वटा नीति, ९ वटा फ्रेमवर्क र १८ वटा मार्गदर्शनहरू जारी भएका छन्। ११ वटा निर्देशिका, ७ वटा म्यानुअल र ४१ वटा कार्यविधि तर्जुमा भएर कार्यान्वयनमा आएका छन्।
