मनी ट्रान्सफर कम्पनीहरूले मुलुक भित्रिने रेमिटेन्समध्ये ५३ प्रतिशत बराबर भित्र्याउने गरेको देखिएको छ।
राष्ट्र बैंकको गत आर्थिक वर्ष २०८०/८१ को गैर बैंकिङ वित्तीय संस्था सुपरीवेक्षण प्रतिवेदनले यस्तो देखाएको हो।
प्रतिवेदन अनुसार आर्थिक वर्ष २०८०/८१ मा कुल ११ खर्ब ६४ अर्ब डलर (करिब १५ खर्ब रूपैयाँ) रेमिटेन्स भित्रिएकोमा रेमिटेन्स कम्पनीहरूबाट ६ अर्ब २१ करोड डलर (करिब आठ खर्ब रूपैयाँ) भित्रिएको हो।
बाँकी पाँच अर्ब ४३ करोड डलर अर्थात् करिब सात खर्ब रूपैयाँ बराबर रेमिटेन्स बैंक तथा वित्तीय संस्थाहरूबाट भित्रिएको छ।
प्रतिवेदन अनुसार मध्यपूर्वी राष्ट्रहरूबाट रेमिटेन्स कम्पनीहरू मार्फत् धेरै रेमिटेन्स भित्रिने गरेको छ।
साउदी अरेबिया, संयुक्त अरब इमिरेट्स (युएई), कुवेत, कतारलगायतका मध्यपूर्वी एसियाली राष्ट्रहरूबाट वार्षिक ४१.८८ प्रतिशत रेमिटेन्स भित्रिने गरेको छ। अर्थात् यी राष्ट्रहरूबाट मनी ट्रान्सफर कम्पनीमार्फत् करिब दुई अर्ब ६० करोड डलर (तीन खर्ब रूपैयाँं) बराबर रेमिटेन्स भित्रिरहेको छ।
त्यस्तै, जापान, मलेसिया, कोरियालगायतका एसिया प्यासिफिक क्षेत्रबाट २४.६३ प्रतिशत रेमिटेन्स भित्रिने गर्छ।
यी राष्ट्रहरूबाट मनी ट्रान्सफर कम्पनीमार्फत् करिब एक अर्ब ५३ करोड डलर (दुई खर्ब रूपैयाँं) बराबर रेमिटेन्स भित्रिरहेको छ।
त्यस्तै उत्तर अमेरिकी मुलुकहरूबाट १३.२५ प्रतिशत रेमिटेन्स भित्रिने गरेको छ। यी राष्ट्रहरूबाट मनी ट्रान्सफर कम्पनीमार्फत् करिब ८२ करोड डलर (एक खर्ब रूपैयाँं) बराबर रेमिटेन्स भित्रिरहेको छ।
बाँकी मुलुकहरूबाट मनी ट्रान्सफर कम्पनीमार्फत् एक अर्ब २५ करोड डलर एक खर्ब ६७ करोड रूपैयाँ बराबर रेमिटेन्स भित्रदै आएको छ। यो रेमिटेन्स कम्पनीहरूबाट भित्रिने रेमिटेन्सको २०.२४ प्रतिशत हिस्सा हो।
राष्ट्र बैंकले रेमिटेन्स पठाइने मुलुक तथा क्षेत्रको आधारमा बैंकहरूबाट भित्रने रेमिटेन्सलाई भने छुट्याएको छैन।
