चिनियाँ इलेक्ट्रिक गाडी कम्पनी बिवाइडीका संस्थापक वाङ चुआन्फुले पाँच मिनेटमै गाडी चार्ज हुने दाबी गरेपछि सेयर बजारमा नयाँ रेकर्ड बनेको छ।
कुनै गाडीमा पेट्रोल भर्न लाग्ने समय जत्तिकै समयमा इभी गाडी चार्ज हुने दाबी गरेसँगै मंगलबार बिवाइडीको सेयरको मूल्य ४ प्रतिशतले बढेर ४०१.४० हङकङ डलर पुगेको फाइनान्सियल टाइम्सले जनाएको छ।
सोमबार अर्बपति संस्थापक वाङले शेनजेन ग्रुपको नयाँ चार्जिङ सिस्टमले बिवाइडीको इभी ब्याट्रीहरू पाँच मिनेटमै चार्ज गरी ४७० किलोमिटर सम्मको दुरी तय गर्नसक्ने बताएका थिए।
यो दाबीसँगै टेस्ला र मर्सिडिज बेन्ज जस्ता आफ्ना प्रतिस्पर्धीभन्दा चार्जिङ प्रविधिमा बिवाइडी अगाडि बढेको संकेत गर्छ।
अहिले इभीको ब्याट्री निर्माण र छिटो चार्जिङ हुने प्रविधि बनाउनमा ठूलो प्रतिस्पर्धा छ।
बिवाइडीले पहिलो चरणमा चार हजार चार्जर जडान गर्ने भनेको छ।
टाइम्सका अनुसार चीनले ४ लाख ६० हजार नयाँ इभी चार्जर राख्ने तयारी गरेको छ।
