पाँच महिनाअघि ३ हजारको विन्दु भेटेर फर्किएको नेप्सेले त्यसपछि पाँच पटकसम्म तह पार गर्ने असफल प्रयासमा देखियो।
मंगलबार कारोबार अवधिमा २७५७ सम्म पुगेको सेयर बजार परिसूचक नेप्सेले यसअघिको उच्च विन्दु २७६४ मा प्रतिरोध सामना गरिरह्यो। गत माघ २१ गते २७६४ मा उचाइ बनाएर घटेको नेप्सेले अहिले त्यही विन्दु आसपासमा प्रतिरोध पाइरहेको हो।
पाँच महिना यता नेप्सेले पाँच पटक प्रतिरोध पाइसकेको छ। पहिलो पटक २८६०, दोस्रो पटक २७८०, तेस्रो पटक २७८८, चौथो पटक २७९५ र पाँचौं पटक २७६४ मा प्रतिरोध पाएर नेप्से घटेको थियो।
यसपटक प्राविधिक विश्लेषणले पनि नयाँ उचाइ बनाउन सक्ने सम्भावनालाई देखाएको छ।
मंसिर १९ यता नेप्सेले 'कप विथ ह्याण्डल' आकृति बनाएको छ। यस्तो आकृति पूरा भएपछि बजार केही बढेमा नयाँ उचाइ बनाउन सक्ने विश्लेषण गरिन्छ।
सेयर बजारमा कस्ता संकेत देखिँदा के गर्ने निर्णय?
कम आकृतिको गहिराई कति छ, त्यहीले नै बजार बढ्न सक्ने विश्लेषण गरिन्छ। यसपटक २७९५ मा उच्च र २५४५ को न्यून विन्दु बनाएको नेप्सेको कपको गहिराई दुई सय ५० अंक छ। अहिलेको ब्रेकआउट विन्दु २७६४ पार गरेमा तीन हजार १४ विन्दु भेट्न सक्ने देखिन्छ।
यसैबीच, मंगलबार नेप्से परिसूचक १२.६८ अंकले बढेर २७४०.५९ विन्दुमा बन्द भएको छ।
यसदिन कारोबार रकम पनि अघिल्लो दिनको तुलनामा बढेको छ।
गत कारोबार दिन अर्थात सोमबार नौ अर्ब ८८ करोडको कारोबार भएकोमा मंगलबार १० अर्ब ४३ करोडको सेयर कारोबार भएको छ।
अघिल्लो दिनको तुलनामा कारोबार रकममा ५५ करोड रूपैयाँ वृद्धि भएको हो।
आज ३१४ वटा धितोपत्रको एक करोड ८२ लाख ३० हजार ३०२ कित्ता सेयर किनबेच भएको हो।
मंगलबार ८७ कम्पनीको सेयर मूल्य बढेको छ भने १४९ वटाको घटेको छ। यस्तै आठ कम्पनीको मूल्य स्थिर रहेको छ।
यसदिन चार कम्पनीको सेयर मूल्य सर्किट लेभलमा बढेको छ।
विन नेपाल लघुवित्त, गुँरास लघुवित्त र इमर्जिङ नेपालको मूल्य १० प्रतिशतका दरले बढेको छ भने गार्डियन माइक्रो लाइफ इन्स्योरेन्सको मूल्य ९.९९ प्रतिशतले बढेको छ।
मंगलबार सप्तकोशी डेभलपमेन्ट बैंकको मूल्य सर्वाधिक १० प्रतिशतले घटेको छ।
उक्त कम्पनीको प्रतिकित्ता मूल्य एक हजार १४१ रूपैयाँ ३० पैसामा झरेको छ।
यस्तै, १०.२५% केबिएल डिबेन्चर २०८६ को मूल्य १० प्रतिशतले घटेर प्रति डिबेन्चर मूल्य एक हजार ८३ रूपैयाँ ६० पैसा कायम भएको छ।
मंगलबार हिमालयन रिइन्स्योरेन्सको सर्वाधिक कारोबार भएको छ।
कम्पनीको प्रतिकित्ता मूल्य ९३६ रूपैयाँमा ८२ करोड दुई लाख रूपैयाँको सेयर कारोबार भएको छ।
यो मूल्य अघिल्लो दिनको तुलनामा ६.८५ प्रतिशत बढेको हो।
सर्वाधिक सेयर खरिद–बिक्री हुने दोस्रो कम्पनीमा नेपाल रिइन्स्योरेन्स कम्पनी रहेको छ। उक्त कम्पनीको प्रतिकित्ता एक हजार ५५ रूपैयाँमा ५१ करोड ६८ लाख बराबरको सेयर कारोबार भएको छ।
आज कारोबारमा आएका १३ वटा समूहगत परिसूचकमध्ये सात समूहको परिसूचक घटेको छ भने बाँकी ६ समूहको परिसूचक बढेको हो।
यसदिन अन्य समूहको परिसूचक सर्वाधिक ३.६७ प्रतिशतले बढेको छ।
यस्तै, विकास बैंक समूहको परिसूचक सर्वाधिक १.७४ प्रतिशतले घटेको छ।
