एनआइसी एसिया बैंकले पाँच अर्ब रूपैयाँ बराबरको अविमोच्य असञ्चिति अग्राधिकार सेयर जारी गर्ने भएको छ।
बैंकले प्रतिइकाई १०० रूपैयाँ दरले पाँच अर्ब रूपैयाँको अग्राधिकार सेयर जारी गर्न लागेको हो।
बैंकले यस्तो सेयर जारी गर्ने प्रस्ताव साधारण सभामा लैजाँदैछ। सभा र नेपाल राष्ट्र बैंकको स्वीकृति पछि बैंकले यस्तो सेयर जारी गर्नेछ।
अविमोच्य असञ्चिति अग्राधिकार सेयरलाई अंग्रेजीमा पर्पेचुअल नन् क्युमुलेटिभ प्रिफेन्सियल सेयर भनिन्छ।
पर्पेचुअलको अर्थ परिपक्व अवधि नतोकिएको भन्ने हुन्छ। नन् क्युमुलेटिभको अर्थ कुनै वर्ष लाभांश वितरण गरिएको छैन भने पनि सो वर्षको लाभांश भनेर अन्य वर्षहरूमा दिनैपर्छ भन्ने बाध्यता नहुनु भन्ने हुन्छ।
यस्तो अग्राधिकार सेयरमा संस्थागत लगानीकर्ताले मात्र लगानी गर्न सक्ने, लाभांश वितरण गर्दा नाफा नोक्सान बाँडफाँट हिसाबमार्फत् चालु आर्थिक वर्षको मुनाफाबाट मात्र गर्नुपर्ने र यसका लागि सञ्चित मुनाफा खाता एवं कुनै पनि कोष खर्च गर्न नपाइने व्यवस्था गरिएको छ।
साधारणतया यस्तो अग्राधिकार सेयर सेयरमा परिणत हुँदैनन्।
कुनै बैंकको जोखिम सम्पत्तिको आधारमा प्राथमिक पुँजी कोष अनुपात ५.१२५ प्रतिशतमा आएमा यस्तो अग्राधिकार सेयरलाई सेयरकै रूपमा परिवर्तन गर्न पाइने व्यवस्था छ।
यो पनि:
पुँजी कोष कम भएका बैंकले अग्राधिकार सेयर जारी गर्न सक्ने
एनएमबी बैंकले ८.२५ प्रतिशत लाभांशको अविमोच्य असञ्चिति अग्राधिकार सेयर जारी गर्ने
