रेमिटेन्स बढेसँगै मुलुकको विदेशी मुद्राको सञ्चितिमा रेकर्ड बन्ने क्रमले निरन्तरता पाइरहेकै छ।
विदेशी मुद्राको सञ्चिति पहिलो पटक २३ खर्ब नाघेको छ।
चालु आर्थिक वर्ष २०८१–८२ को ६ महिनासम्म (साउनदेखि पुस) मा यस्तो सञ्चिति २३ खर्ब १६ अर्ब रूपैयाँ पुगेको छ।
डलरको आधारमा पनि हालको सञ्चिति ऐतिहासिक उच्च हो। हाल यस्तो सञ्चिति १६ अर्ब ८४ करोड डलर छ।
मुलुकमा रहेको विदेशी मुद्राको यस्तो सञ्चितिले १४ महिना १२ दिन दिनको वस्तु तथा सेवाको आयात धान्न सक्छ। गत कात्तिकमा यस्तो सञ्चितिले १५ महिना तीन दिनसम्मको आयात धान्ने देखिन्थ्यो।
लामो समय कमजोर देखिएको आयातमा सुधार हुन थालेसँगै सञ्चितिले धान्ने अवधि घट्न थालेको हो। यो अवधिमा ७.१ प्रतिशतले बढेर आठ खर्ब २२ अर्ब रूपैयाँको आयात भएको हो।
अघिल्लो वर्षको यही अवधिमा सात खर्ब ६८ अर्ब रूपैयाँको आयात भएको थियो।
मुलुकले सात महिनासम्मको आयात धान्ने सञ्चिति भए पर्याप्त भएको मानिन्छ।
