डलरको मूल्य हालसम्मकै उच्च भएपछि एसियाली राष्ट्र हरूमा यसले दबाब पर्न थालेको छ।
चाइनिज युआन, जापानी येन, कोरियन वन, भारतीय मुद्रामा दबाब देखिएको हो।
अमेरिकी राष्ट्रपतिको रूपमा दोस्रो कार्यकालको लागि डोनाल्ड ट्रम्प निर्वाचित भएर आएयता मात्रै डलरको भाउ ५.३९ प्रतिशतसम्म बढेको अन्तराष्ट्रिय सञ्चारमाध्यम सिएनबिसीले उल्लेख गरेको छ।
डलरको मूल्य हालसम्मकै उच्च हो। तर, मूल्यवृद्धिको समायोजनपछिको आधारमा हिसाब गरेर हेर्दा समेत डलरको भाउ ५५ वर्षयताकै उच्च देखिएको बैंक अफ अमेरिकालाई उद्धृत गर्दै इन्भेष्टोपिडियाले पनि लेखेको छ।
सोचेभन्दा राम्रो अमेरिकाको रोजगारसम्बन्धी तथ्यांक आएपछि केन्द्रीय बैंकले गर्न सक्ने भनिएको नीतिगत ब्याजदर कटौती तत्काललाई नहुने मानिएको छ। यही कारण पनि डलरको भाउ बढिरहेको हो। गत डिसेम्बरमा अमेरिकामा २ लाख ५६ हजारले रोजगारीमा वृद्धि भएको देखिएको हो।
निर्वाचन अभियान ताका ट्रम्पले अमेरिकामा सामान निर्यातमा विदेशी बस्तुलाई लाग्ने कर वृद्धि गर्ने घोषणाले पनि डलरलाई बलियो बनाइ राखेको छ।
सन् २०२५ सम्मको मध्यसम्म बलियो बनाइराख्न सक्ने संकेत विश्लेषकहरूले गरेका छन्।
डलरको मूल्य बढ्दै जाँदा जापानी येन ३८ वर्षयताकै न्यून तहमा आएको बताइन्छ। एक डलरको लागि करिब एक सय ६२ येनसम्म खर्चिनुपर्ने अवस्था आएको थियो।
येनमा परेको दबाब कम गर्न त्यहाँ करेन्सी इन्टरभेन्सन समेत गर्यो। आफ्नो मुद्रामा परेको दबाब कम गर्न जापानले आफ्नै मुद्रा किन्ने र बेच्ने समेत गर्यो। यसको लागि मात्रै जापानले ९७ अर्ब डलरसम्म खर्च गरेको बताइन्छ।
तर पनि सोचे अनुसार डलरको तुलनामा येन बलियो हुन सकेको छैन। अहिले पनि त्यहाँका जनताले एक डलरको लागि करिब एक सय ५८ येन खर्चिनु परिरहेको छ।
दक्षिण कोरियाले पनि यस्तै करेन्सी इन्टरभेन्सन गरेको खबर बाहिरिएको भए पनि रकम खुल्न सकेको छैन्। अहिले एक डलर बराबर एक हजार चार सय ७७ कोरियन वन पर्छ।
चिनियाँ युआन पनि डलरसँग करिब १६ महिनायताकै उच्च दरमा अवमूल्यन भएको छ। अहिले एक डलरको लागि ७.३३ युआन पर्छ।
त्यस्तै, डलरसँग भारतीय मुद्राको विनिमयदर समेत हालसम्मकै न्यून छ। हाल एक डलरको लागि करिब ८५.९७ भारु परिरहेको छ। त्यहाँ विदेशी मुद्राको सञ्चिति समेत १० महिना यताकै न्यून भएको छ। सात सय चार अर्ब डलरसम्म रहेको विदेशी मुद्रा सञ्चिति करिब पाँच सय ४५ अर्ब डलरमा सीमित भएको बताइन्छ।
डलरसँग भारतीय मुद्रामा हुने उतारचढावकै आधारमा त्यसको प्रभाव नेपाली मुद्रामा समेत पर्ने गरेर पेग्ड (स्थिर विनिमयदर) राखिएको छ।
यो पनि :
डलरमा 'ट्रम्प ट्रेड' प्रभाव, विनिमय दर हालसम्मकै उच्च
