गत आर्थिक वर्ष २०८०/८१ मा वाणिज्य बैंकहरूको नाफा समग्रमा सात अर्ब रूपैयाँले बढेको छ।
अघिल्लो आर्थिक वर्ष २०७९/८० मा यस्तो नाफा ५६ अर्ब ४८ करोड रहेकोमा गत आर्थिक वर्ष यसमा करिब १२ प्रतिशत वृद्धि भएर ६४ अर्ब ६ करोड पुगेको छ।
सञ्चालनमा रहेका २० वाणिज्य बैंकहरूले प्रकाशित गरेको वित्तीय विवरण अनुसार यस्तो देखिएको हो।
प्रभु बैंकको नाफा सबैभन्दा धेरै ९३.७५ प्रतिशतले बढेर ४ अर्ब ४८ करोड रूपैयाँ पुगेको छ। रकमका आधारमा सबैभन्दा धेरै नाफा नबिल बैंकको छ। बैंकको नाफा ७ अर्ब ६ करोड पुगेको छ।
बैंकहरूको मुख्य व्यवसायबाट हुने आम्दानी खुद ब्याज आम्दानीमा सामान्य सुधार भए पनि प्रावधान रकम २६ प्रतिशतले घटेपछि नाफामा सुधार भएको हो। बैंकहरूको खुद ब्याज आम्दानी ३.२५ प्रतिशतले बढेर एक खर्ब ९२ अर्ब रूपैयाँ पुगेको छ। यसअघि यस्तो आम्दानी एक खर्ब ८५ अर्ब रूपैयाँ थियो।
बैंकहरूले यसअघि ५० अर्ब रूपैयाँ प्रावधानमा राखेकोमा यसपटक ३८ अर्ब राखेका हुन्। राष्ट्रिय वाणिज्य बैंकले भने सात करोड रूपैयाँ राइट ब्याक समेत गरेको छ।
बैंकहरूको औसतमा खराब कर्जा २.९७ प्रतिशतबाट बढेर ३.४३ प्रतिशत पुगेको छ। गत आर्थिक वर्षको तेस्रो त्रैमाश (माघदेखि चैत)को तुलनामा औसतमा यसमा सुधार देखिएको छ। दोस्रो त्रैमाशमा खराब कर्जा कुल कर्जाको ३.४८ प्रतिशत थियो।
केही बैंकहरूले ऋणीलाई पुनर्कर्जा सुविधा दिएकोले पनि खराब कर्जा केही घटेको देखिएको हो। खराब कर्जा ४ प्रतिशत माथि हुनेको बैंकको संख्या आठ छ। गत आर्थिक वर्षको तेस्रो त्रैमाशमा यस्ता बैंकको संख्या १० थियो।
पछिल्लो समय मुलुकमा देखिएको आर्थिक शिथिलतासँगै बैंकहरूको कर्जा असुलीमा समस्या भइरहेको छ। यसले खराब कर्जा बढाइरहेको थियो। तर, राष्ट्र बैंकले यसअघि खराब कर्जाको रूपमा वर्गीकरण भएको कर्जाको किस्ता नियमित भएपनि ६ महिनासम्म त्यसलाई असल वर्गमा रूपान्तरण गर्न नपाउने व्यवस्थालाई संशोधन गरेर केही राहत दिएको छ।
बैंकहरूले यस्तो कर्जालाई सुक्ष्म निगरानीमा राख्न सक्ने व्यवस्था गरिएको छ। यसले २५ देखि शत प्रतिशतसम्म नोक्सान व्यवस्था गर्नुपर्नेमा पाँच प्रतिशतमात्रै नोक्सानी व्यवस्था गरे हुने भएको हो।
सबैभन्दा धेरै खराब कर्जा हुनेमा कुमारी र नेपाल इन्भेष्टमेन्ट बैंक अग्रस्थानमा छ। यी बैंकको यस्तो अनुपात ४.९५ प्रतिशत छ। सानिमा बैंकको यस्तो सूचक सबैभन्दा कम ०.५१ प्रतिशत छ।
बैंकको लाभांश दिने क्षमतामा सुधार भएपनि अधिकांश बैंकको लाभांश क्षमता कमजोर नै छ। लाभांश दिनसक्ने बैंकको यस्तो क्षमता एक प्रतिशतदेखि २९ प्रतिशतसम्म छ।
चार वाणिज्य बैंकले लगानीकर्तालाई केही दिन सक्ने अवस्था देखिँदैन। बैंकहरूको प्रतिसेयर आम्दानी औसतमा १७.९ प्रतिशत छ। यसभन्दा अघि यस्तो अनुपात १८.०९ प्रतिशतसम्म थियो।
| बैंक | खुद नाफा | खुद व्याज आम्दानी | खराब कर्जा अनुपात % | प्रावधान | प्रति सेयर आम्दानी % | वितरण योग्य नाफा रकम | | लाभांश क्षमता % |
| असार २०८१ | असार २०८० | असार २०८१ | असार २०८० | असार २०८१ | असार २०८० | असार २०८१ | असार २०८० | असार २०८१ | असार २०८० | असार २०८१ | असार २०८० | असार २०८१ |
| नबिल बैंक | ७०६ | ६४० | १६२० | १७७४ | ३.८५ | ३.३९ | ३२२ | ५४२ | २६.०९ | २७.८२ | ३८५ | ३१८ | १४.२६ |
| राष्ट्रिय वाणिज्य बैंक | ३३९ | ३५९ | १०२३ | ११८१ | ३.६५ | ३.७७ | | २६० | २१.७३ | २४.२२ | ५८ | ९१ | ३.७२ |
| सिटिजन्स बैंक | १३४ | १८६ | ५६८ | ५८२ | ४.०७ | ३.३९ | १७६ | १२१ | ११.३७ | ९.४५ | ६१. | ८४ | ४.३४ |
| कुमारी बैंक | २३० | ५१ | १०९८ | ११०६ | ४.९५ | ४.९६ | ३५६ | ८११ | ८.८ | १.९७ | -३७८ | -२२० | |
| नेपाल इन्भेष्टमेन्ट मेगा | ५१९ | ३७२ | १५०१ | १२३० | ४.९५ | ४.५४ | ३२० | ३२० | १५.२३ | १३.९२ | -३४३ | -३४७ | |
| ग्लोबल आइएमइ | ६०१ | ६६९ | १६६३ | १७१० | ४.३७ | ३.१५ | ३७४ | ३४२ | १६.६५ | २२.०६ | ११० | ३२४ | ३.०६ |
| लक्ष्मी सनराइज बैंक | ३०३ | २२८ | ११५९ | ५६८ | ४.७२ | २.९१ | ३४१ | १०६ | १३.०९ | १९.६४ | १२८ | १७२ | ५.५५ |
| माछापुच्छ्रे | १२५ | १६२ | ५०० | ५३७ | ३.६३ | २.२६ | १०७ | ११४ | १०.७६ | १३.९९ | ४६ | १०६ | ४.०१ |
| एनआइसी एशिया | १३८ | ४४४ | १०६१ | १२२५ | ३.४१ | ०.८८ | २८४ | ७२ | ९.२६ | ३८.४४ | -२३० | ३५३ | |
| नेपाल बैंक | १६५ | ३४३ | ८८० | ९४० | ३.२८ | २.८५ | २५९ | १११ | ११.२८ | २३.३९ | ७६ | ०.०३ | ५.२४ |
| एनएमबी | २३३ | ३२२ | ७४९ | ८३४ | ३.२७ | २.७५ | १९२ | १४५ | १२.७२ | १७.५५ | २३ | ११४ | १.३ |
| नेपाल एसबीआइ | २१० | १९६ | ५०७ | ५७६ | २. | २.४३ | ६३ | १५१ | १९.१८ | १८.७४ | ११३ | १०७ | ११ |
| एभरेष्ट बैंक | ३७० | ३३६ | ७६६ | ७४२ | ०.७१ | ०.७९ | २१ | ७७ | ३१.४५ | ३१.४३ | ३५१ | ४११ | २९.८६ |
| सानिमा बैंक | २३८ | २६० | ६१७ | ६४७ | ०.५१ | ०.६३ | १४९ | १०५ | १७.५४ | २०.९१ | १४१ | २२१ | १०.४ |
| प्रभु बैंक | ४४८ | २८ | १२०२ | १००६ | ४.७८ | ४.९८ | ५५ | ५२१ | १९.०३ | १.१९ | १२२ | -२२३ | ५.२ |
| हिमालयन बैंक | २८३ | १५६ | ११६१ | ९९२ | ४.९१ | ४.९३ | २७८ | ४८६ | १३.१ | ५.१८ | -५७८ | -३२४ | |
| स्ट्याण्डर्ड चार्टर्ड बैंक | ३३० | ३४६ | ५१५ | ५९५ | २.१४ | १.१८ | २१ | ५९ | ३५.०९ | ३६.७५ | २४९ | २०४ | २६.५ |
| सिद्धार्थ बैंक | ३१० | ३१६ | ७९९ | ८१८ | २.२२ | २.०१ | १२३ | ११८ | २१.४ | २२.४८ | ३६ | ६६ | २.६ |
| प्राइम कमर्सियल बैंक | ३७७ | १०२ | ८०० | ७१४ | ४.६७ | ४.८५ | १२४ | ४१० | १९.४५ | ५.३ | ११९ | -६६ | ६.१८ |
| कृषि विकास बैंक | ३६५ | १३२ | १०१२ | ८१९ | ३.४ | २.८ | १२३ | १४५ | २४.७५ | ७.४ | २६६ | १२४ | १७.३७ |
