हायर पर्चेज कम्पनीले अब सबै प्रकारका विद्युतीय र निजी सवारी साधनमा मूल्यको ६० प्रतिशत मात्रै फाइनान्सिङ गर्न पाउने भएका छन्।
हायर पर्चेज कर्जा दिने कम्पनीलाई स्वीकृत दिने नीतिगत एवं प्रक्रियागत व्यवस्थामा संशोधन गर्दै राष्ट्र बैंकले यस्तो व्यवस्था गरेको हो।
संशोधनमा भनिएको छ, 'सवारी साधन खरिद गर्न कर्जा प्रवाह गर्दा देहाय बमोजिमका सवारी साधन (विद्युतीय र निजी) का लागि ऋण मूल्यको अनुपात (लोन टू भ्यालू रेसियो) अधिकतम ६० प्रतिशतसम्म मात्र कायम गर्नुपर्नेछ।'
हाल राष्ट्र बैंकबाट लाइसेन्स लिएका हायर पर्चेज कम्पनीहरूले ८० प्रतिशत फाइनान्स गर्दै आएका थिए। तर अब सबै प्रयोजनका विद्युतीय र निजी प्रयोजनका व्यक्तिगत सवारी साधनमा ६० प्रतिशत मात्रै फाइनान्सिङ गर्न पाउने भएका हुन्।
कम्पनीहरूले आफ्नो खुद सम्पत्तिको १० गुणासम्म बैंक तथा वित्त कम्पनीहरूबाट ऋण तथा सापटी लिएर कर्जा दिँदै आएका छन्।
