नेपाल बैंकर्स संघका अध्यक्ष तथा माछापुच्छ्रे बैंकका प्रमुख कार्यकारी अधिकृत सन्तोष कोइरालाले विद्युतीय सवारीसाधन (इभी) कर्जामा राज्यले स्पष्ट नीति नल्याए आगामी दिनमा बैंकहरूमा समस्या आउने बताएका छन्।
'नाडा अटो डाइलग'मा बोल्दै कोइरालाले करिब १ खर्ब २९ अर्ब रूपैयाँ बराबरको कर्जा सवारी क्षेत्रमा गएको उल्लेख गरे।
'यो ठूलो रकम हो, जुन सम्पूर्ण बैंकिङ प्रणालीबाट इभी लगायत सवारी क्षेत्रमा गएको हो,' उनले भने, 'यदि हामीले दीर्घकालीन सोचसहित नीति निर्माण गर्न सकेनौं भने जोखिम बढ्दै जान्छ।'
उनले इभी कसैले पनि जथाभावी नेपाल ल्याउन नपाउने स्पष्ट नीति आवश्यक भएको बताए।
'इभी ल्याउन र किन्न एक खालको मापदण्ड आवश्यक छ,' कोइरालाले भने, 'हाम्रो नीति, रणनीति र पूर्वाधार निर्माण यो अनुरूप अघि बढ्नुपर्छ।'
उनले सरकार र राष्ट्र बैंकले इभीलाई लिएर जिम्मेवारीपूर्वक र समन्वयात्मक नीति ल्याएमा मात्रै यो क्षेत्र दीर्घकालीन रूपमा लाभदायक हुनसक्ने धारणा राखे।
'हामीले जुनसुकै क्षेत्रलाई प्राथमिकता दिँदा पनि दीर्घकालीन वित्तीय स्थायित्वको ख्याल गर्नुपर्छ,' उनले थपे।
इभीको आयात, पूर्वाधार निर्माण र कर्जा प्रवाहबीच सन्तुलन नजाँदा बैंकहरूको जोखिम असमान्य रूपले बढ्न सक्छ।
राज्यले स्पष्ट, खुकुलो र व्यवहारिक नीति ल्याएर मात्र यो क्षेत्रमा सन्तुलित विकास सम्भव हुने उनले बताए।
