भारतमा विद्युतीय गाडी सस्तो हुने भएको छ।
भारत सरकारले सन् २०२५/२६ को बजेटमार्फत विद्युतीय गाडी (इभी) उत्पादनमा विभिन्न कर छुटको घोषणा गरेपछि भारतीय बजारमा इभी सस्तो हुने भएको हो।
भारतकी वित्तमन्त्री निर्मला सीतारमणले लिथियम आयोन ब्याट्रीमा लाग्दै आएको कर घटाउने घोषणा गरेकी छन्, जसका कारण गाडीको उत्पादन लागत कम हुनेछ।
ब्याट्री उत्पादनका लागि आवश्यक कोबाल्ट, लिड, जिंक, ब्याट्री केससहित १२ वस्तुमा लगाइँदै आएको कर हटाइएको हो।
साथै, भारत बाहिरबाट आयात गरिने ३५ वस्तुमा पनि कर हटाउने घोषणा गरिएको छ। यसले भारतीय बजारमा विद्युतीय गाडीको मूल्य घट्ने र उपभोक्ताहरूलाई सुलभ मूल्यमा गाडी उपलब्ध हुने अपेक्षा गरिएको छ।
यस बाहेक विद्युतीय गाडी उत्पादनमा संलग्न स्टार्टअप कम्पनीहरूलाई दिइने कर्जाको सीमा १० करोडबाट बढाएर २० करोड पुर्याइएको छ।
भारत सरकारले दिएको यस्तो प्रोत्साहनले भारतको अटोमोबाइल क्षेत्रलाई अझ प्रवर्द्धन गर्ने र उत्पादन लागत घटाउने बताइएको छ।
भारतमा उत्पादन लागत घट्दा नेपालमा बिक्री हुने भारतीय विद्युतीय गाडीको मूल्य पनि प्रतिस्पर्धात्मक हुने अपेक्षा गरिएको छ।
नेपालमा हाल भारतीय विद्युतीय गाडीको मूल्य तुलनात्मक रूपमा महँगो छ।
