पठाओले कोशी प्रदेशका मुख्य सहरहरूसँगै मुलुकभर थप १७ सहरमा 'बाइक राइड' सेवा विस्तार गर्ने भएको छ।
मुलुकभर सेवा विस्तार गर्ने नीतिअनुसार बागमती प्रदेशको काठमाडौं उपत्यका र चितवनमा मात्रै सीमित पठाओको सेवा छिट्टै थप सहरमा उपलब्ध गराउन लागिएको पठाओ नेपालका प्रबन्ध निर्देशक असिम मान सिंह बस्न्यातले जानकारी दिए।
बस्न्यातका अनुसार राइड सेयरिङ सेवाको पर्याय बनेको पठाओको सेवा अब कोशी प्रदेशका नौ सहरहरू विराटनगर, दमक, उर्लाबारी, विराटचोक, इटहरी, इनरुवा, धरान, बिर्तामोड र भद्रपुरमा उपलब्ध हुनेछ।
मधेस प्रदेशको वीरगञ्ज र जनकपुरमा पनि सेवा उपलब्ध रहेको कम्पनीले जनाएको छ।
त्यसैगरी बागमती प्रदेशको हेटौँडा, गण्डकी प्रदेशको पोखरा, लुम्बिनी प्रदेशको बुटवल, नेपालगञ्ज र भैरहवा तथा सुदूरपश्चिम प्रदेशको धनगढीमा पठाओको सेवा विस्तार हुन लागेको हो। भविष्यमा अन्य सहरमा पनि सेवा विस्तार गर्ने कम्पनीको योजना छ।
'नजिकैको एक सहरबाट अर्को सहरमा जान इन्टर सिटी बुकिङ समेत गर्न मिल्ने गरी पठाओको सेवा विस्तार गर्न लागेका छौँ,' बस्न्यातले भने।
बस्न्यातका अनुसार सेवा विस्तार गर्न लागिएका सहरमा बाइक राइडर दर्ताको प्रक्रिया पनि सुरू भएको छ।
'राइडर बन्न इच्छुकले नवीकरण भएको लाइसेन्स, बिलबुक र इन्स्योरेन्स कागजात सहित आबद्धताका लागि आवेदन दिन सक्नुहुनेछ। कागजी प्रक्रिया पूरा भएपछि उनीहरूलाई अनलाइनमार्फत् तालिम पनि दिइन्छ', बस्न्यातले भने, 'इच्छुकले आबद्धताका लागि पठाओको सामाजिक सञ्जाल वा ०१–५९७००९९ मार्फत सम्पर्क गर्न सक्नेछन्।'
राइडर बन्नेहरुले प्ले स्टोरबाट 'पठाओ ड्राइभ' एप डाउनलोड गर्नुपर्ने कम्पनीले बताएको छ।
हाल पठाओको विभिन्न सेवामा दुई लाख बढी व्यक्ति आबद्ध छन्। एक लाख ९० हजारभन्दा बढी बाइक राइडर, १० हजारभन्दा बढी क्याप्टेन (ट्याक्सी चालक) र फुड डेलिभरीमा ५ हजार बढी दर्ता भइसकेका छन्।
पठाओले राइडसँगै पठाओ फुड, बजार र पार्सल सेवा पनि उपलब्ध गराउँदै आएको छ।
पठाओले दुर्घटना भइ मृत्यु भए वा अंगभंग भएमा १० लाख रूपैयाँसम्म र उपचार लागि एक लाख रूपैयाँसम्मको बीमाको व्यवस्था गरेको छ।
