दक्षिण कोरियाको लागि नेपाली राजदुत शिवमाया तुम्बाहाम्फेले दूतावासलाई प्रवासीसँग प्रत्यक्ष जोड्ने प्रतिबद्धता जनाएकी छन्।
गैर आवासीय नेपाली संघ(एनआरएनए)को आयोजनामा भएको अन्तरक्रिया कार्यक्रममा बोल्दै राजदूत तुम्बाहाम्फेले कोरियामा रहेका नेपालीको समस्या समाधानका लागि आफूले अभिभाकीय भूमिका खेल्ने समेत बताइन्।
'मैले नेपाली समुदायका समस्यालाई नजिकबाट बुझ्ने प्रयास गर्दैछु। दूतावासलाई प्रवासी नेपालीहरूसँग अझ सशक्तरूपमा जोड्नु पर्छ,' उनले भनिन्, 'नेपाली श्रमिकहरूका हकहितका लागि कोरियाका विभिन्न निकायहरूसँग निरन्तर समन्वय गर्दै दूतावासका सेवा प्रवाहलाई प्रभावकारी बनाउन म केन्द्रित हुनेछु।'
श्रम काउन्सिलर मैया कँडेलले नेपाली श्रमिकहरूको सुरक्षाका लागि दूतावासले आवश्यक सहयोग तथा परामर्श निरन्तर उपलब्ध गराउने प्रतिबद्धता जनाइन्।
एनआरएनए दक्षिण कोरियाका अध्यक्ष बुद्धि गुरुङले प्रवासी नेपालीहरूका समस्याहरू समाधान गर्न एनआरएनए दक्षिण कोरिया दूतावाससँग सहकार्य गर्दै अगाडि बढ्ने बताए।
कार्यक्रममा विभिन्न नेपाली संघसंस्थाका पदाधिकारीहरू, व्यवसायी, विद्यार्थी, श्रमिक, राजनीतिक दलका पदाधिकारी, एनआरएनए अभियन्ता तथा सामाजिक अभियन्ताहरूको उल्लेखनीय उपस्थिति रहेको थियो।
सहभागीहरूले रोजगारी सुरक्षा, श्रमिक कल्याण, कानुनी सहयोग, भिसा र आप्रवासनसम्बन्धी मुद्दा, सामाजिक एकता, सांस्कृतिक, पर्यटन , विद्यार्थीका समस्या तथा दूतावास सेवामा सुधारको विषयमा आफ्ना जिज्ञासाहरू राखेका थिए।
