ग्लोबल नेपाली
बागलुङका भविन्द्र बस्नेत सन् २००० मा होटल म्यानेजमेन्ट पढ्न थाइल्याण्ड गए। पढाइ सकेर फर्किन्छु अनि नेपालमै केही गर्छु भनेर गएका भविन्द्रले उतै आफ्नो व्यवसाय सुरू गरे।
'मेरो जिन्दगीको झण्डै आधा उमेर उतै बित्यो भन्दा पनि हुन्छ। होटल म्यानेजमेन्ट पढेपछि साथीहरू मिलेर केही गरौं भन्ने भयो। नजिकको देश अनि भाषा र संस्कृति मिल्ने भएकाले उतै बस्यौं,' भविन्द्रले भने, 'मैले हस्पिटालिटी क्षेत्रमा काम गरेको छु। २ वटा रेस्टुरेन्ट अनि साथीहरूसँग मिलेर होटल सञ्चालन गरेको छु। फ्रोजन फुडको समेत हामीले ठूलो मात्रामा व्यापार गर्छौं।'
क्रोइसेन्ट, मफिन, चकलेट लाभा लगायतका बेकरी सामान बजारबाट किन्ने अनि आफ्नो कम्पनीको ट्याग लगाएर बेच्ने उनले बताए।
उनको पार्टनरसिपमा रहेको बिके ग्रुपले बेकरीको सामान विभिन्न ठाउँमा बनाउन दिन्छ। त्यसको गुणस्तर मापन गरेर ट्याग लगाएपछि उनीहरूले बजारमा बिक्री गर्छन्।
'मैले र मेरो टिमले खाद्यान्नकै क्षेत्रमा काम गरेका छौं। रेस्टुरेन्ट र होटलमा अन्तर्राष्ट्रिय स्तरको खाना बेच्छौं। त्यहाँ हामीले इभेन्ट हल समेत चलाएका छौं,' उनले भने, 'बिएम ग्रुपले नेपालमा दुई वटा पोलिक्लिनिक सञ्चालन गरेको छ। गुल्मीको आपचौरमा कफी खेती सुरू हुँदैछ भने हाइड्रोमा समेत लगानी गरेका छौं।'
थाइल्याण्ड र नेपालमा विभिन्न क्षेत्रमा लगानी गरेका बस्नेत एनआरएनए थाइल्याण्डका अध्यक्ष समेत हुन्। मार्च १५ र १६ तारिकमा थाइल्याण्डमा हुन लागेको युवा सम्मेलनको तयारीमा उनी जुटेका छन्। विशेष गरेर पिपुल्स अफ नेप्लिज ओरिजन (पिएनओ) लाई केन्द्रित गरेर आयोजना हुन लागेको सम्मेलनमा थाइल्याण्ड, म्यानमार, फिजी, मलेसियामा झण्डै ५ पुस्ता अगाडि गएर बसेकाहरू सहभागी हुने बस्नेतले बताए। त्यो सम्मेलनले उनीहरूको ज्ञान, सीप र क्षमताको पहिचान गर्न समेत सहयोग पुग्ने बस्नेतको तर्क छ।
'थाइल्याण्ड, म्यानमार लगायतका देशहरूमा पाँच पुस्ताअघि गएर बसेको भए पनि उनीहरूको नागरिकतामा गोर्खाज/नेप्लिज भनेर उल्लेख गरिएको छ। उनीहरू नेपालसँग जोडिन चाहन्छन्।कतिले आफ्ना सन्तानलाई नेपालमा पढाउन चाहन्छन्,' उनले भने, 'त्यसैले उनीहरूलाई पिएनओ परिचय पत्र दिनुपर्छ भन्ने हाम्रो माग हो। उनीहरूसँग सम्बन्धित देशको नागरिकता/पासपोर्ट हुन्छ।नेपाल आउँदा आफूहरू नेपाली मूलको भनेर प्रतिनिधित्व होस् भन्ने मात्र हो।'
पिएनओलाई नेपालको शिक्षासँग जोड्न सक्दा त्यसको फाइदा नेपाललाई हुने भन्दै बस्नेतले आर्थिक, सामाजिक र सांस्कृतिक सबै क्षेत्रमा सहयोग पुग्ने बताए। त्यसकै लागि आफूहरूले युवा सम्मेलन गर्न लागेको उनले बताए।
पिएनओको सबभन्दा धेरै बसाइ भएको म्यानमार र त्यसपछि थाइल्याण्ड रहेको भन्दै बस्नेतले मलेसिया, फिजी लगायतका देशमा पनि केही भएको र सबैको केन्द्र थाइल्याण्ड रहेको उनले बताए।
बस्नेतका अनुसार म्यानमारबाट रोजगारीका लागि आएकाहरूको समेत गणना गर्ने हो भने १ लाखको हाराहारीमा नेपाली भाषीहरू थाइल्याण्डमा छन्।
सेतोपाटी ग्लोबलका अन्य सामग्री पढ्न यहाँ क्लिक गर्नुहोस्
ग्लोबल नेपालीबारे यो इमेलमा सम्पर्क गर्नुहोस्- setopatidebate@gmail.com
-1742801159.jpg)
