नोरदेन रूम्बाका गीत सुनाउन दार्जिलिङको एक सांगीतिक परिवार काठमाडौं आएका छन्।
हरेक अंग्रेजी महिनाको अन्तिम शुक्रबार नेपालयको आरसालामा आयोजना हुँदै आएको सांगीतिक कार्यक्रम पलेंटीमा यस पटक चन्दन लोमजेल, डेजी बराइली र विमोचना लोमजेल प्रस्तुत हुने भएका हुन्।
चन्दनले दार्जिलिङका सुप्रसिद्ध गीतकार नोरदेन रूम्बाका गीतमा धुन भरेर ल्याएका छन्। जसलाई लोकप्रिय स्वर–सिल्पी डेजी र विमोचनाले गाउनेछन्। यो कार्यक्रम एउटै परिवारको पुरानो र नयाँ पुस्ताको सांगीतिक संगम पनि हुनेछ।
पलेँटी कार्यक्रम आजभन्दा २० वर्ष पहिलेदेखि सञ्चालन हुँदै आएको लघु सांगीतिक कार्यक्रम हो।
नोरदेन रूम्बा दार्जिलिङको नेपाली साहित्यिक जगतमा स्थापित नाम हो। रूम्बाले दार्जिलिङ बसेर गरेका सिर्जनाले नेपाली साहित्यिक क्षेत्रको धुरी अग्लिएको छ। सन् १९४९ मा दार्जिलिङमै जन्मिएका गीतकार रूम्बा ४० वर्षको उमेरसम्म मात्र भौतिक रूपमा यस संसारमा रहे तर उनले छाडेर गएका साहित्यिक रचना र गीतहरूले अझै पनि नेपाली कला जगतलाई गुन लगाइरहेका छन्।
संगीतकार चन्दन लोमजेलकै धुनमा मूर्धन्य नेपाली गायक नारायणगोपालले स्वर दिएको 'मेरा सबै रात अब, मातहरू भए' गीत नोर्देन रूम्बाकै सिर्जना हो। त्यस्तै संगीतकार कर्म योञ्जनको धुनमा अरुणा लामाले गाएको 'फूललाई सोधेँ, कहाँ गयौ कता गयौ भमरा' संगीतकार बद्री–दुर्गा खरेलको धुनमा रहेका 'गाइने दाइलाई सुनकेशरीको केश सोध्नै भुलेँ' र दावा ग्याल्मोले स्वर दिएको 'शुभकामना खाली खाली दिनेलाई दानी भनेर जाँदैछु' नोर्देन रूम्बाकै शब्द हुन्।
संगीतकार चन्दन लोमजेलकै धुनमा डेजी बराइलीले स्वर दिएका – 'कति बग्यो कति बग्यो, पुलमुनि पानी रेसम' साथै नेपालको लोकरक ब्याण्ड नेपथ्यले गाएको 'कसैले सोधे कुन हो तिम्रो गाऊँ' पनि नोरदेनकै सिर्जना हुन्।
यो महिनाको पलेँटीमा भने उनले लेखेका तर आजसम्म कतै रेकर्डमा नआएका गीतहरू प्रस्तुत हुनेछन्। त्यसबारे कार्यक्रम संयोजक आभास भन्छन् – 'नोर्देनले आफ्नो जीवनको उत्तरकालमा रचेका रचनाहरू संगीतकार चन्दन लोमजेलसँग थन्किएका छन् भन्ने जानकारी हामीलाई भयो। त्यसपछि हामीले चन्दनजीलाई अनुरोध गरेर ती रचनालाई नेपाली संगीतप्रेमी माझ ल्याउने जमर्को गरेका हौं।'
पहिलो पल्ट सन् २००६ मा पलेँटी कसेका चन्दन भन्छन् – 'पलेँटीले पुराना सर्जकहरूका रचनालाई सरक्षण गर्ने जुन उद्देश्य राखेको छ त्यसबाट प्रभावित भएर नै यसपाली पनि पलेँटीमा आएका छौं। गीतकार दाजु नोरदेन रूम्बाका रचना पलेँटीमा सरक्षण गर्ने उद्धेश्य सुन्ने बित्तिकै हौसिएको म यहाँ आएर वाद्यवादकहरूसँग अभ्यास गरिरहँदा झन् हौसिएको छु।'
चन्दन झैँ सन् २००६ मै पहिलोपटक पलेँटीमा आएकी डेजी बराइली भन्छिन् – 'पहिलोपाली पलेँटीमा आउँदा त यो कार्यक्रमका बारेमा अनभिज्ञ थिएँ। त्यसपछि आइरहन मन लाग्थ्यो र बेलाबखत आइ पनि रह्यौ। कोभिड महामरीपछि भने आउने चाहना र योजना हुँदा हुँदै पनि आउन पाइएन। अहिले यहाँ आइपुग्दा त सपनै जस्तो लागेको छ।' उनी थप्छिन् – ’'त्यतिबेला विमोचना सानै थिइनः अहिले हेर्नु त! सँगसँगै गाउने गरी आएकी छिन्।'
आफ्नो जिन्दगीको सबैभन्दा पहिलो स्टेजको सम्झना गर्दै विमोचना भन्छिन् – 'त्यो बेला संजोगले मैले पलेँटीको स्टेजमा गाउने मौका पाएकी थिएँ। सायद त्यही दिनले गर्दा होला म पनि गायन क्षेत्रमै रमाइ रहेकी छु। आज आफ्नो उही पहिलो स्टेजमा आइपुग्दा साह्रै खुशी लागेको छ। हामी परिवार नै एकसाथ यति लामो कन्सर्टमा उत्रन लागेको यो नै पहिलो मौका हो।' उनी थप्छिन् – 'बाबा आमासँग एउटै मञ्चमा उत्रन पाउनु एउटा खुशी, फेरि यस्ता गहकिला शब्द गाउन पाउनु अर्को खुशी हो।'
पलेँटी कार्यक्रम यही फेब्रुअरी महिनाको अन्तिम शुक्रबारः २८ तारिख र मार्च १ तारिखः शनिबारका दिन आयोजना हुनेछ।
कालिकास्थानस्थित नेपालयको ‘आर’सालामा कार्यक्रम हुनेछ।
-1742801159.jpg)
