म्युजिक भिडिओमा एक समयका निकै चर्चित र व्यस्त कोरियोग्राफर एवं निर्देशक हुन् शिव बिक।
'सररर पानी घट्टमा, माझी दाइ पोखरा फेवातालको, सालको पातको टपरी, चरी जेलैमा’ लगायतका थुप्रै गीत छन्, जसको भिडिओ शिवको कोरियोग्राफीमा बनेका हुन्।
अभिनेता राजेश हमाल, भुवन केसी लगायतलाई पनि उनले लोकदोहोरी गीतको भिडिओमा नचाएका छन्।
उनै शिव पछिल्लो दुई वर्षयता अमेरिकामा छन्। त्यहाँ रहेर पनि उनले बेलाबेलामा नेपाली म्युजिक भिडिओको कोरियोग्राफी एवं निर्देशन गरिरहेका हुन्छन्।
दुई दिनअघि मात्रै उनको निर्देशनमा बनेको 'परदेशी' बोलको गीतको भिडिओ युट्युबमा सार्वजनिक भएको छ।
यसमा शान्तिश्री परियार र प्रकाश पराजुलीको स्वर छ। प्रकाशकै संगीत रहेको गीतका शब्द पनि उनकै हुन्।
भिडिओमा अमेरिकामै रहेकी मोडल रञ्जिता गुरूङ र हरी घिमिरेले अभिनय गरेका छन्।
म्युजिक भिडिओमा एक समय निकै चलेकी मोडल रञ्जिता पनि दुई वर्षअघि अमेरिका गएकी थिइन्।
'परदेशी' गीतको भिडिओ सर्जक एवं गायक प्रकाश पराजुलीको अफिसियल युट्युबमा सार्वजनिक छ।
