गायक प्रचण्डबाबु राईले 'यो मायाले के गर्यो के गर्यो’ बोलको गीत सार्वजनिक गरेका छन्।
शनिबार काठमाडौंमा आयोजित कार्यक्रममा गायक यम बराल, संगीतकारहरू सुरेश अधिकारी, गणेश पराजुली, वसन्त सापकोटा लगायतले गीतको विमोचन गरे।
प्रेमभावको यो गीतमा वसन्त सापकोटाको शब्द तथा संगीत छ। गीतलाई महाराज थापाले एरेन्ज गरेका हुन्।
भिडिओ सार्वजनिकपछि बोल्दै गायक यम बरालले गायकी र भिडियो मेकिङको प्रशंसा गरे।
संगीतकार सुरेश अधिकारीले सुगम संगीतमा आधारित गीतको शब्द, संगीत, गायकी र भिडियो राम्रो लागेको बताए। संगीतकार वसन्त सापकोटाले आफूले केही वर्षअघि लेखेको शब्दमा संगीत भरेर गायक प्रचण्डबाबुसँग सहकार्य गर्दा यसले जीवन पाएको महशुस भएको बताए।
गायक प्रचण्डबाबु राईले आफू अनौपचारिक रुपमा करिब दुई दशकदेखि संगीतमा लागेको भए पनि अढाई वर्षअघि मात्रै पहिलो गीत गर्ने अवसर पाएको बताए।
अब संगीतमा केही गर्ने सोच बनाएको बताउँदै नयाँ गीतको अडिओ र भिडिओ दुबैमा मेहनत गरेको बताए।
निर्देशक निकेश खड्काको निर्देशनमा बनेको भिडिओमा स्मारिका ढकाल, नमराज नेपाल र प्रेम राईले अभिनय गरेका छन्।
भिडिओमा बुद्ध थापाको छायांकन र विकास धमलाको सम्पादन तथा कलर संयोजन छ। 'यो मायाले के गर्यो के गर्यो’ लाई ‘वसन्त सापकोटा’ युट्युब च्यानलमा रिलिज गरिएको छ।
