मुटुरोग विशेषज्ञ डा. स्मृति शाक्यले 'मैले माया...' बोलको गीत सार्वजनिक गरेकी छन्।
मनमोहन कार्डियोथोरासिक भास्कुलर एण्ड ट्रान्सप्लान्ट सेन्टरमा उपप्राध्यापकका रूपमा कार्यरत उनले आफ्नो एकल स्वरमा गीत ल्याएकी हुन्।
उनकै 'डा स्मृति शाक्य' युट्युब च्यानलमार्फत सार्वजनिक यो प्रेम बिछोडको गीतमा डा. अजय क्रान्ति शाक्यको शब्द तथा संगीत छ।
गीतको भिडिओमा अभिनेता आकाश श्रेष्ठ र अभिनेत्री करूणा श्रेष्ठले मोडलिङ गरेका छन्। साथमा डा. स्मृति शाक्य स्वयंम समेत देखिएकी छन्।
देवकुमार श्रेष्ठको निर्देशनमा तयार भिडिओलाई रोशन के. श्रेष्ठले छायांकन, गौतमराज खड्काले सम्पादन गरेका हुन्।
काठमाडौं र ललितपुरका विभिन्न स्थानमा भिडिओ खिचिएको हो।
डा. स्मृति पछिल्लो समय चिकित्सकीय पेशासँगै गायनको क्षेत्रमा पनि रूचि राख्दै आएकी छन्।
यसअघि उनले अरूणा लामा र रुद्रमणिको गायन तथा अम्बर गुरूङको संगीत रहेको गीत 'ए–कान्छा मलाई सुनको तारा खसाइ देऊन' को कभर गीत गाइसकेकी छन्। सो गीतको कभर उनले संगीतज्ञ हरिशरण सायमीसँग गाएकी थिइन्।
डा. स्मृति शाक्यका केही गीतहरू रेकर्डिङ भएर छायांकनको क्रममा छन्।
