टिकटक प्लेटफर्मबाट म्युजिक भिडिओमा उदाएका जुम्ल्याहा दिदीबहिनी हुन् प्रिज्मा र प्रिन्सी खतिवडा।
टिकटकमा लाखौं फ्लोअर्स कमाएका उनीहरूले म्युजिक भिडिओमा पनि राम्रो चर्चा पाए। एक जनालाई मात्र अफर आएका भिडिओमा उनीहरूले मोडलिङ गरेनन्। संगसंगै दर्जनौं भिडिओमा देखिए।
यसैबीच प्रिन्सीले हिन्दी गीतमा मोडलिङ सुरू गरिन्। बलिउडको चर्चित कम्पनी 'टी–सिरिज' को 'जान देंगे तुम्हे' गीतको भिडिओसहित 'बारिशे', 'हो जाने दो' लगायतका हिन्दी गीतमा समेत प्रिन्सीले मोडलिङ गरिसकेकी छन्।
प्रिन्सी लगातार हिन्दी गीतमा व्यस्त भएपछि प्रिज्माले पनि उनीबिना गीतमा मोडलिङ गर्न थालेकी छन्।
शुक्रबार सार्वजनिक 'लाम लाम पिरती' प्रिन्सीबिना प्रिज्माले काम गरेको पहिलो नेपाली म्युजिक भिडिओ हो।
छविराज सुनार र शान्तिश्री परियारको स्वर रहेको यसको भिडिओमा प्रिज्मा र प्रकाश सपुतलाई जोडीका रूपमा प्रस्तुत गरिएको छ।
सुनिल वि.क.को निर्देशनमा बनेको यो भिडिओमा दिलिप रायमाझी र करिष्मा मानन्धरको समेत अभिनय छ।
