रेखा थापा अभिनीत तथा निर्मित फिल्म 'उपहार' को शीर्ष गीत सार्वजनिक भएको छ।
बिहीबार ओएसआर डिजिटल युट्युब च्यानलमार्फत फिल्ममा समावेश 'हारेको छैन' बोलको गीत सार्वजनिक गरिएको हो। गीतमा अभिनेत्री रेखा थापा, बेनिशा हमाल, पूजा शर्मा, मुकुन भुषाल, सुष्मा कार्की फिचर्ड छन्। रविन भुषालको स्वर रहेको गीतमा अर्जुन पोखरेलको संगीत तथा प्रमोद ढुंगानाको शब्द छ।
ज्ञानेन्द्र देउजा निर्देशित फिल्ममा मुकुन भुषाल, तेज गिरी, समर्पणजंग कार्की, सुष्मा कार्की, अंशु महर्जन, आशा भुुषाललगायत कलाकारको अभिनय छ। अभिनेत्री थापाका श्रीमान बलराम शाही ठकुरी कार्यकारी निर्माता रहेको फिल्मका निर्माता सुलभ प्रतिक र समीक्षा देउजा हुन्।
रेखा फिल्म्स र कपनगढी फिल्म्सको ब्यानरमा निर्माण भएको फिल्ममा विष्णु कल्पित घिमिरेको छायांकन, अर्जुन पोखरेल र बाबुल गिरीको संगीत, मित्र डि गुरुङको सम्पादन, सुलक्षण भारतीको कथा, भारतीका साथै अभिमन्यू निरवी र माधव शर्माको पटकथा तथा संवाद, अनुपम गौतमको भिएफएक्स र रोशन श्रेष्ठको द्वन्द्व निर्देशन छ।
'उपहार' सामाजिक विषयवस्तुमा आधारित रहेकाले फिल्ममा हास्यरसदेखि रोदनसम्म सबै कुराको समिश्रण रहेको निर्देशक देउजा बताउँछन्।
यो फिल्म फागुन २५ गतेदेखि प्रदर्शन हुँदैछ।
