कन्दरा ब्यान्डले पोखरामा सांगीतिक प्रस्तुति दिएको छ।
'हङकङ पोखरा', 'तगारोमा रूमाल', 'लेककी हे माया', 'तिमी पारी', 'डाँडापारी' लगायत कालजयी गीतहरू प्रस्तुत गरी नेपाली फोक-पप संगीतमा आफ्नो अमिट छाप छोडेको कन्दरा ब्यान्डले पुस २७ गते पोखरामा सांगीतिक प्रस्तुति दिएको हो।
नेपाल सरकारको आन्तरिक पर्यटकीय अभियान 'पहिला घरदेश, अनि परदेश, आन्तरिक पर्यटनको प्रवर्द्धन' सन्देश लिई कन्दराको नेपालका ८ स्थानमा कन्सर्ट गर्ने तयारी छ।
कन्दरा ब्यान्डको व्यवस्थापन गरिरहेको कम्पनी एल्फा स्क्वायरका अनुसार पोखरा प्रदर्शनी केन्द्रमा आयोजित कार्यक्रममा १० हजारभन्दा बढी दर्शकहरूको उपस्थिति रहेको थियो।
'पोखरामा जन्मिएको कन्दरा ब्यान्ड आजको यो कार्यक्रमबाट पुनर्जन्म लिएको छ। यही भावना र यही सोच लिएर हामी हरेक प्रदेशमा जानेछौं, हरेक पोखरेलीलाई नेपाल घुमाउनेछौं। जहाँ जानेछौं त्यहाँ पनि नेपाललाई मनैदेखि माया गर्ने वातावरण बनाउनेछौं,' कन्दराका गायक विवेक श्रेष्ठले भने।
पोखरा पर्यटन परिषदको आयोजनामा गण्डकी प्रदेश सरकार, मुख्यमन्त्री तथा मन्त्रीपरिषद्को कार्यालय, उद्योग, पर्यटन, बन, तथा वातावरण मन्त्रालय, नेपाल पर्यटन बोर्ड, पोखरा महानगरपालिका, पोखरा प्रज्ञा-प्रतिष्ठान, लाइन्स क्लब अफ पोखरा-सामीप्य, आदि संघ-संस्थाले प्रवर्द्धन गरिरहेका छन्।
