बलिउड कलाकार विक्की कौशल र कट्रिना कैफलाई ज्यान मार्ने धम्की दिएको आरोपमा एक व्यक्ति पक्राउ परेका छन्।
विगत केही दिनदेखि लगातार ज्यान मार्ने धम्की आएपछि विक्की कौशलले आफ्नो म्यानेजरमार्फत प्रहरीमा उजुरी दिएका थिए।
उजुरीमा विक्कीले एक व्यक्तिले आफ्नी श्रीमती कट्रिनालाई सोसल मिडियामार्फत ज्यान मार्ने धम्की दिइरहेको बताएका छन्। उसले आफूलाई पनि मार्ने धम्की दिएको उजुरीमा उल्लेख छ। यो धम्कीको शृङ्खला केही दिनदेखि चलिरहेको उनले बताएका छन्।
उजुरी पाए लगत्तै प्रहरीले मलविन्दर सिंह नामका एक व्यक्तिलाई मुम्बईबाट पक्राउ गरेको छ। उनीमाथि थप अनुसन्धान भइरहेको प्रहरीले जनाएको छ।
केही दिनअघि सलमान खानलाई पनि ज्यान मार्ने धम्की आएको थियो। जुन ५ को बिहान सलमानका बुवा सलीम घुम्न बाहिर निस्कँदा बाटोमा एक अज्ञात व्यक्तिले उनलाई र सलमानलाई ज्यान मार्ने धम्कीको चिठ्ठी दिएका थिए।
८ महिना अगाडि मात्र विवाह बन्धनमा बाँधिएका कट्रिना र विक्की पछिल्लो समय आ-आफ्नो सिनेमामा व्यस्त छन्।
कट्रिना चाँडै सलमान खानसँग फिल्म ‘टाइगर ३’ मा देखिनेछिन्। यसबाहेक उनी सिद्धान्त चतुर्वेदी र इशान खट्टरसँग ‘फोन भूत’ मा देखिनेछिन्।
यस्तै विक्की सारा अली खानसँग आफ्नो आगामी फिल्म ‘प्रोडक्सन नम्बर २५’ को सुटिङमा व्यस्त छन्। यस बाहेक विक्कीले चाँडै ‘गोविन्द नाम मेरा’, ‘द ग्रेट इन्डियन परिवार’ र निर्देशक लक्ष्मण उतेकरको अर्को अनटाइटल फिल्ममा देखिनेछन्।
