बलिउड अभिनेता शाहरूख खानका छोरा आर्यन खानको निर्देशनमा बनेको पहिलो सिरिजको नाम सार्वजनिक गरिएको छ।
आर्यन खानको डेब्यू सिरिजको नाम 'द ब्याडस अफ बलिउड' हो। सोमबार नेटफ्लिक्सले मुम्बईमा एक कार्यक्रम राखेको थियो। जसमा शाहरूख खान, शाहरूखकी श्रीमती गौरी खान, छोरी सुहाना खान, र छोरा आर्यन खान सहभागी भएका थिए।
कार्यक्रममा शाहरूखले छोरा आर्यनको डेब्यू सिरिजको बारेमा कुराकानी गर्दै भने, 'बाँकी सबै व्यक्ति यसको यति धेरै ख्याल राख्छन्। म नामको मात्रै मेकर हुँ। मेरो कुरा निकै सरल छ। यहाँ सबै मेकर्स, निर्देशक, लेखक, प्रोडक्सन सबै मभन्दा राम्रो छन्। मेरो छोराले निर्देशनमा कदम राखेका छन्। दुनियाँले जति माया मलाई दिएका छन्। त्यसको ५० प्रतिशत पनि उनलाई दिनुभयो भने धेरै हुनेछ।'
नेटफ्लिक्स र रेड चिलिज इन्टरटेनमेन्टले पछिल्लो नोबेम्बरमा सिरिजको घोषणा गरेको थियो। यो सिरिज ६ एपिसोडमा हुनेछ। सिरिजमा सलमान खान, शाहरूख खान, रणवीर कपूर, बादशाह, बबी देओल लगायतको केमियो रहनेछ।
