बलिउडकी चर्चित अभिनेत्री हुन् आलिया भट्ट। हालै उनको फिल्म 'जिगरा' प्रदर्शन भएको थियो। तर फिल्मले भारतीय बक्स अफिसमा राम्रो कमाइ गर्न सकेन।
पछिल्लो फिल्मले बक्स अफिसमा राम्रो कमाइ नगरेपनि उनलाई थुप्रै फिल्मको अफर आइरहेका छन्। उनी सञ्जयलीला भन्सालीको फिल्म 'लभ एन्ड वार' को तयारीमा छिन्। यो फिल्म बाहेक उनी यशराज फिल्म्सको स्पाई युनिभर्सको फिल्म 'अल्फा' मा देखिनेछिन्।
भारतीय सञ्चारमाध्यम मिड डेका अनुसार हालै आलिया निर्देशक नाग अश्विनको फिल्ममा जोडिएकी छन्। यस फिल्मको बजेट ५०० करोड भारू रहने बताइएको छ।
'कल्की २८९८' को सफलतापछि नाग अश्विनले यस फिल्ममा काम गर्न लागेका हुन्। आलिया र नाग आश्विन दुवै नयाँ फिल्मलाई लिएर उत्साहित छन्।
यो फिल्म हैदराबादस्थित प्रोडक्शन हाउस वैजयंती फिल्म्सको ब्यानरबाट बन्ने छ। तर अहिलेसम्म फिल्मको नाम तय गरिएको छैन। यो फिल्म सन् २०२५ मा छायांकनमा जानेछ।
